దాతృత్వానికి ప్రేరణ ఖురాన్‌

ఒకసారి కొందరు నిరుపేదలు ప్రవక్త (స) సన్నిధికి వచ్చారు. వారి దుస్తులపై అనేక చిరుగులున్నాయి. వారి ముఖాల్లో ఆకలి ఛాయలు కనిపించాయి. ఆ దీన స్థితిని చూసిన ప్రవక్త హృదయం ద్రవించింది. వెంటనే బిలాల్‌ (రజి) అనే అనుచరుణ్ణి పిలిచి అజాన్‌ ఇవ్వ మన్నారు. నమాజ్‌ ముగిసిన తర్వాత ‘ఏ దేవుణ్ణి స్మరిస్తూ మీరంతా హక్కులను కోరుకుంటారో ఆ దేవుడికి భయపడండి! బంధుమిత్రు లతో అనుబంధాలను తెంచుకోవద్దు. అల్లాహ్‌ సదా మిమ్మల్ని గమనిస్తున్నాడని తెలుసుకోండి! ఆయనకు భయపడండి. రేపటి కోసం ఏం సమకూర్చుకున్నారో మీరంతా తరచి చూసుకోండి’ అంటూ ఖురాన్‌ పఠించారు. ఆ వాక్యాలతో ప్రేరణ పొందినవారంతా తోచినంత సాయం చేశారు. కొందరు బస్తాల నిండా ఖర్జూరాలను తీసుకొచ్చారు. చూస్తుండగానే, దుస్తులు ఆహార పదార్థాలు, వస్తుసామగ్రి కుప్పలుగా పోగయ్యింది. ఆ ఔదార్యాన్ని చూసిన ప్రవక్త ముఖం మేలిమి బంగారంలా మెరిసింది.

ముహమ్మద్‌ ముజాహిద్‌