విభూతి రేఖల సంకేతం

ఒకప్పుడు హైందవ ధర్మానికి ప్రతీకగా పురుషులు నుదుట గంధాన్ని, స్త్రీలు కుంకుమను మాత్రమే ధరించేవారు. నొసట నామం, త్రిపుండ్రం దిద్దుకునేవారు కాదు. రామాయణ, భారత, భాగవతాది పురాణేతిహాసాలు ఉద్భవించిన తర్వాత అవి ప్రజల మనసుల్లోకి చొచ్చుకుపోయాయి. అంతకు ముందు త్రిమూర్తులను సైతం నడిపించే శక్తి మరొకటుందని గాఢంగా నమ్మేవారు. శైవ, వైష్ణవ అంటూ విభేదాలు లేకుండా అందరూ ఐకమత్యంగా ఉండేవారు. క్రమంగా విష్ణువును ఆరాధించే వారు, శివుణ్ణి పూజించేవారు.. రెండు వర్గాలుగా విడిపోయి కలహించుకోవడం ఆరంభించారు. నుదుట గంధం, కుంకుమలతో నిలువు నామాలు, విభూతి అడ్డరేఖలు అప్పుడే మొదలయ్యాయి. నుదుట మూడు విభూతి రేఖలనే త్రిపుండ్రం అంటారు. ఎవరి నమ్మకం వారిది, త్రిమూర్తులు అందరికీ ఆరాధ్యులేనంటారు ఆధ్యాత్మికవేత్తలు. 3 సంఖ్య బ్రహ్మ సంఖ్యగా భావిస్తారు. మూడు గీతల ఉద్దేశం అదే. నామధారణ అపమృత్యు దోషాలను తొలగించి ఆరోగ్యాన్ని ప్రసాదిస్తుందన్నది భక్తుల విశ్వాసం. 

ప్రతాప వెంకట సుబ్బారాయుడు