టీకాల సామర్థ్యానికి యాంటీబయాటిక్స్‌ కళ్లెం!

శిశువులకు తొలి ఆరు నెలల్లో రకరకాల టీకాలు ఇస్తుండటం తెలిసిందే. రెండో ఏడాదిలో బూస్టర్‌ మోతాదులూ ఇస్తుంటారు. అయితే ఇవి అందరిలో అంతే సమర్థంగా పనిచేయకపోవచ్చు. ఇందుకు వివిధ కారణాలు ఉండొచ్చు. యాంటీబయాటిక్‌ మందుల వాడకమూ వీటిల్లో ఒకటని తాజా అధ్యయనంలో బయటపడింది. రెండేళ్ల లోపు వయసులో యాంటీబయాటిక్‌ మందుల చికిత్స తీసుకున్నవారిలో పోలియో, డీపీటీ, హిమోఫిలస్‌ ఇన్‌ఫ్లూయెంజా టైప్‌ బి, న్యుమోనియా టీకాలకు రోగనిరోధక ప్రతిస్పందన తక్కువగా ఉంటున్నట్టు పరిశోధకులు గుర్తించారు. వీరిలో ఆయా టీకాలతో పుట్టుకొచ్చే యాంటీబాడీల మోతాదులు తక్కువగా ఉంటుండటం గమనార్హం. ఒకసారి యాంటీబయాటిక్‌ చికిత్స తీసుకున్న పిల్లలతో పోలిస్తే ఎక్కువసార్లు తీసుకున్న పిల్లల్లో యాంటీబాడీలు మరింత తక్కువగా ఉంటున్నట్టూ బయటపడింది. యాంటీబయాటిక్‌ మందులతో పిల్లల పేగుల్లోని బ్యాక్టీరియా వైవిధ్యం అస్తవ్యస్తం కావటం దీనికి కారణమవుతుండొచ్చని భావిస్తున్నారు. పిల్లలకు అతిగా యాంటీబయాటిక్‌ మందులు వాడటం తగదనే విషయాన్ని అధ్యయన ఫలితాలు మరోసారి నొక్కిచెబుతున్నాయి.