Updated : 21 Jun 2022 07:54 IST

ఎముకలకు పొగ!

పొగ తాగటం ఎముకలకు హానికరం! పొగతాగే మగవారికి ఎముకలు గుల్లబారటం, విరగటం, అకాల మరణం ముప్పులు పెరుగుతున్నట్టు యూనివర్సిటీ ఆఫ్‌ నెవెడా, లాస్‌ వేగాస్‌ (యూఎన్‌ఎల్‌వీ) అధ్యయనం పేర్కొంటోంది. ఇందులో మొత్తం 27 పరిశోధనలను విశ్లేషించారు. పొగ తాగేవారికి ఎముకలు విరిగే ముప్పు 37 శాతం పెరుగుతున్నట్టు గుర్తించారు. తుంటి మాత్రమే కాకుండా మణికట్టు, భుజాలు, కాళ్లు, వెన్నెముక వంటి ఇతర భాగాలకూ పొగతో ముప్పు పొంచి ఉంటున్నట్టు బయటపడింది. తుంటి విరిగే ముప్పు 30 శాతం, వెన్నెముక విరిగే ముప్పు 40 శాతం పెరుగుతుండటం గమనార్హం. ఎముకలు విరిగిన పొగరాయుళ్లలో 21-37 శాతం మంది ఏడాదిలోపే మరణిస్తుండటం ఆందోళనకరం. సాధారణంగా ఎముకలు గుల్లబారటం పురుషుల కన్నా మహిళల్లో ఎక్కువ. కానీ పొగ అలవాటుతో మగవారికీ దీని ముప్పు పెరుగుతోందని పరిశోధకులు చెబుతున్నారు. సిగరెట్లలోని రసాయనాలు ఎముక కణాల మీద విపరీత ప్రభావం చూపుతాయి. విటమిన్‌ డి, క్యాల్షియంను శరీరం సరిగా గ్రహించుకోకుండా అడ్డుపడతాయి. ఇవి ఎముకల పటుత్వాన్ని దెబ్బతీస్తాయి. అంతేకాదు.. పొగతో కణజాలం మరమ్మతు కావటమూ నెమ్మదిస్తుంది. దీంతో గాయం మానటం, ఎముక అతుక్కోవటం ఆలస్యమవుతుంది. అగ్నికి ఆజ్యం పోసినట్టు ఇది సమస్యను మరింత జటిలం చేస్తుంది. కాబట్టి పొగ అలవాటును మానుకోవటం మంచిదని.. దీంతో ఎముకలు విరగటం, వైకల్యం, అకాల మరణం ముప్పులను నివారించుకోవచ్చని పరిశోధకులు సూచిస్తున్నారు.


Advertisement

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని