ఆందోళనకు రక్త పరీక్ష!

ఆందోళన (యాంగ్జయిటీ) సమస్య తరచూ చూసేదే. కొందరిలో ఇది రోజువారీ వ్యవహారాలకూ విఘాతం కలిగిస్తుంటుంది. దీన్ని ప్రస్తుతం మాట్లాడటం ద్వారానే గుర్తిస్తున్నారు. ఇలా ఆందోళనకు గురయ్యేవారి భావాలను తెలుసుకుంటున్నారు. మందులను సూచిస్తున్నారు. అయితే కొన్ని మందులు అలవాటయ్యే ప్రమాదముంది. ఇది మరిన్ని సమస్యలకు కారణం కావొచ్చు. అందుకే ఆందోళనను గుర్తించటానికి అమెరికా పరిశోధకులు రక్త పరీక్షను రూపొందించారు. ఇది రక్తంలోని ఆర్‌ఎన్‌ఏ బయోమార్కర్ల ద్వారా ఆందోళనను గుర్తిస్తుంది. దీని ద్వారా ఆందోళన ముప్పును అంచనా వేయటమే కాదు, తీవ్రతనూ అంచనా వేయొచ్చు. తగిన మందులను ఎంచుకోవటానికీ తోడ్పడుతుంది. అనవసరంగా మందులు ఇవ్వకుండా కాపాడుతుంది. మందులకు బదులు ఆలోచనా తీరును మార్చే చికిత్సలు, జీవనశైలి మార్పులను సూచించటానికి వీలు కల్పిస్తుంది.