ఈ నగరానికి దారేది ?

దీవిలో ఉన్న ఊరిలోకి బస్సులు, జీపులు, కార్లు వేసుకుని వెళ్లలేం... ఎందుకంటే వాటికి రహదారి మార్గమే ఉండదు... కానీ ఓ నగరం దీవిలో లేకపోయినా రోడ్లు ఉండవు... ఎందుకో ఏమిటో ? ఇంతకీ ఏమా నగరం? ఎక్కడుంది?

పెరూ దేశంలోని ఇక్విటుస్‌ సిటీలో ఇంచుమించు ఐదు లక్షల మంది జనాలు నివసిస్తుంటారు. మన దగ్గర ఉన్నట్లే స్కూళ్లు, ఆసుపత్రులు, షాపింగ్‌ కాంప్లెక్స్‌లు ఇలా బోలెడన్ని సౌకర్యాలూ ఉంటాయి. ఏ నగరమైనా ఇలాగే ఉంటుంది. అందులో ఏముంది ప్రత్యేకత అంటారా? ఆ.... అక్కడే ఉంది అసలు సంగతి. ఈ నగరంలోకి ఎవరైనా వెళ్లాలన్నా... అక్కడి ప్రజలు వేరే ప్రాంతాలకు ప్రయాణించాలన్నా... అయితే పడవల్లో వెళ్లాలి. లేదంటే హెలీకాఫ్టర్‌ లాంటి వాటిల్లో గగన విహారం చేయాలి. కారణం ఈ నగరానికి వేరే ఏ ప్రాంతాన్నీ కలుపుతూ రోడ్లు ఉండవు.

* ఎందుకబ్బా? చుట్టూ నీళ్లతో ఉండే దీవిలో ఉందా ఏంటీ ఈ నగరం? అనే సందేహం వచ్చింది కదూ. కానీ కాదు. ఇదో అడవి పట్టణం. అమెజాన్‌ నది గురించి వినే ఉంటారుగా. ఆ నది పరివాహక ప్రాంతంలోనే ఈ నగరం ఉంటుంది. పైగా ననయ్‌, ఇటాయా అనే రెండు నదులూ ఈ సిటీ దగ్గరే కలుస్తాయి. అందుకే ఈ సిటీకి ఒకవైపు మొత్తం నీళ్లుంటాయి. మిగతా వైపులా దట్టమైన అమెజాన్‌ అడవి ఉంటుంది.

* ప్రపంచంలోనే రహదారులు లేని పెద్ద నగరం ఇది. కానీ ఈ ఊళ్లో మాత్రం మామూలుగా మన దగ్గర ఉన్నట్టే ఉంటాయి రోడ్లన్నీ. కార్లు, రిక్షాలు, ఆటోలు అన్నీ తిరిగేస్తాయి.
* ఒకప్పుడు ఇక్కడ స్థానిక తెగల ప్రజలుండేవారు. ఆ తర్వాత ఇతర ప్రాంతాల నుంచీ వచ్చిస్థిరపడ్డారు. రబ్బరు, కలప పరిశ్రమలు, పర్యటకం వల్ల ఇది ధనిక పట్టణమయ్యింది.
* ఇక్కడికి దేశదేశాల నుంచి పర్యటకులు వస్తుంటారు. ప్రత్యేక ఆకర్షణ అమెజాన్‌ నది,అడవి. ఫ్లోటింగ్‌ హోటల్‌, బటర్‌ఫ్లై జూ వంటివీ సందర్శకుల్ని ఆకట్టుకుంటాయి.