పిట్టకొంచెం... జ్ఞాపకశక్తి ఘనం!

వయసు 14 నెలలు.. మాటలే సరిగా రాని వయసు... అడుగులూ తడబడే వయసు కానీ ఏకంగా ఓ రికార్డే కొల్లగొట్టేశాడు.. ‘గూగుల్‌ బాయ్‌’గానూ పేరు సంపాదించాడు మరి ఆ బుడతడు ఎవరు? సాధించిన ఘనతేంటో తెలుసుకుందామా!

మధ్యప్రదేశ్‌లోని రేవాకు చెందిన సంజయ్‌, శివాని మిశ్రా దంపతుల కుమారుడు యశస్వి మిశ్రా. వయసు 14 నెలలు మాత్రమే. కానీ అప్పుడే అద్భుత ప్రతిభను ప్రదర్శిస్తున్నాడు. కేవలం 3 నిమిషాల వ్యవధిలో 26 దేశాల జాతీయ జెండాలను గుర్తించి ‘వరల్డ్‌ బుక్‌ ఆఫ్‌ రికార్డ్స్‌’లో తన పేరు నమోదు చేసుకున్నాడు ఈ బుడతడు. దీంతో దేశంలోనే అత్యంత చిన్నవయసులో ‘గూగుల్‌ బాయ్‌’గా యశస్వి గుర్తింపు పొందాడు. అంతకు ముందు మనదేశం తరఫున ఈ రికార్డు కౌటిల్య పేరిట ఉండేది. ఆ చిన్నారి 4 ఏళ్ల వయసులో రికార్డు సృష్టించాడు. దాన్ని ఇప్పుడు యశస్వి తిరగరాశాడు.

అమ్మానాన్న చేయూతతో...

ఆరు, ఏడు నెలల వయసు నుంచే యశస్వికి అద్భుతమైన జ్ఞాపకశక్తి ఉంది. తండ్రి సంజయ్‌, తల్లి శివాని మిశ్రా.. యశస్వికి పూలను చూపించి వాటిని గుర్తు పట్టమనేవారు. ఆ చిన్నారి ఒక్కసారికే గుర్తుపెట్టుకుని చెప్పేవాడు. అత్యంత చిన్న వయసులోనే తమ పిల్లాడి ప్రతిభను చూసిన తల్లిదండ్రులు, యశస్వికి అద్భుతమైన జ్ఞాపకశక్తి ఉందని గుర్తించి ఆ మేరకు శిక్షణ ఇచ్చారు. ఇప్పుడు 194 దేశాల జాతీయ పతాకాలను గుర్తించి సరికొత్త రికార్డు సృష్టించేందుకు యశస్వికి తర్ఫీదు ఇస్తున్నారు. ఈ బుడతడు భవిష్యత్తులో మరిన్ని ఘనతలు సాధించాలని మనం ఆల్‌ ది బెస్ట్‌ చెప్పేద్దామా!