పెరుగు బాగా తోడుకోవాలంటే...

మా అమ్మ పెరుగు తోడు పెడితే.. గడ్డ పెరుగు తోడుకొనేది. కమ్మగా ఉండేది. నేను ఇంట్లో పెరుగు తోడుపెడుతుంటే గడ్డకట్టడం లేదు సరికదా... పుల్లటి వాసన వస్తోంది. దీనికేమైనా చిట్కాలుంటాయా?

కొవ్వు తీయని పాలను తోడుపెట్టుకుంటే పెరుగు చిక్కగా, రుచిగా వస్తుంది. తోడుపెట్టేటప్పుడు పాలు మరీ చల్లగా, మరీ వేడిగా కాకుండా గోరువెచ్చగా ఉండేట్టు జాగ్రత్తపడాలి. పాలల్లో పెరుగుని కలిపి అలాగే వదిలేయకూడదు. ఒక గిన్నెలోంచి మరో గిన్నెలోకి తోడు పూర్తిగా కలిసేటట్టు తప్పనిసరిగా నురుగు వచ్చేవరకూ అటూఇటూ నాలుగైదు సార్లు అనాలి. ఇలా అయితేనే  గట్టిగా తోడుకుంటుంది. తోడుకోసం పుల్లని పెరుగుని వాడొద్దు. స్టీలు గిన్నెల్లో కన్నా మట్టి పాత్రల్లో అయితే పెరుగు కమ్మగా రుచిగా వస్తుంది. మాడిపోయిన పాలని వాడితే పెరుగు వాసన వస్తుంది. తినలేం. అలాగే తోడు పెట్టాక ఒక ఎండు మిర్చి వేసినా పెరుగు గట్టిగా వస్తుంది.
 

జవాజీ లోక్‌నాథ్‌, చెఫ్‌, హైదరాబాద్‌