బలాన్నిచ్చే ధామ్‌ కీ దాల్‌

మనం శనగలతో ఛోలే చేస్తాం కదా! హిమాచల్‌ప్రదేశ్‌ వాసులు శనగపప్పుతో చేసే ‘ధామ్‌ కీ దాల్‌’ కొంచెం అలాంటిదే. ఎంతో సులువుగా తయారయ్యే ఈ వంటకం జబర్దస్త్‌గా ఉంటుందంటూ ఇష్టంగా తింటారు. ముఖ్యంగా చలికాలం వేగంగా చేసుకుని వేడి వేడిగా తింటుంటారు. ఇంతకీ దీన్నెలా చేయాలంటే... ముందుగా శనగపప్పును నాలుగు గంటలు నానబెట్టి, ఉడికించాలి. ఉడుకుతున్నప్పుడు వచ్చే నురుగు తెట్టె కట్టినట్టవుతుంది. దాన్ని తీసేస్తుండాలి. అందులో చెంచా చొప్పున సోంపు, మెంతులు, ధనియాలు, జీలకర్ర, అర కప్పు ఉల్లి తరుగు, తగినంత ఉప్పు, ఒకటిన్నర టేబుల్‌ స్పూన్‌ ఆవాల నూనె, ఒక టేబుల్‌ స్పూన్‌ నెయ్యి వేసి కలియబెట్టాలి. ఒక పాత్రలో అర గ్లాసు నీళ్లు పోసి.. అందులో పావు చెంచా చొప్పున జాజికాయ పొడి, మెంతుల పొడి, గరం మసాలా, పసుపు, ధనియాల పొడి, కారం, అర చెంచా చొప్పున ఛోలే మసాలా, మిరియాల పొడి, పావు చెంచా యాలకుల పొడి, తగినంత ఉప్పు వేసి కలిపి.. ఆ మిశ్రమాన్ని ఉడుకుతున్న పప్పులో వేయాలి. మరో పావుగంట సన్న సెగ మీద ఉడికించి, రెండు చెంచాల నెయ్యి జతచేసి.. దించేయాలి. అంతే టేస్టీ టేస్టీ ధామ్‌ కీ దాల్‌ తయారైపోతుంది. ఇది రుచికరమే కాదు, మంచి పోషకాహారం కూడా.