దురాశతో దేవుడు దూరం

రామకృష్ణ పరమహంస మేనల్లుడి పేరు హృదయ రాం. అతడు వారితోనే కోల్‌కతా దక్షిణేశ్వరాలయ నివాసగృహంలో ఉండేవాడు. ఓ రోజు అతడో కోడెదూడను తెచ్చి దగ్గర్లో ఉన్న తోటలో కట్టేశాడు. వాహ్యాళికి వెళ్తూ దాన్ని చూసిన గురుదేవులు- ‘ఇదెక్కడిది? ఇక్కడెందుకు కట్టేశావు?’ అనడిగారు. ‘మావయ్యా! దీన్ని నేనే తెచ్చాను. దీనికి చక్కగా మేతవేసి పెంచి, పెద్దయ్యాక మా ఊరికి తీసుకు వెళ్లాలన్నది నా ఆలోచన. ఇప్పుడిలా పెంచితే రేపు నాకు ఉపయోగపడుతుంది కదా’ అన్నాడు మేనల్లుడు. ఆ మాటలు విని రామకృష్ణులు ఆశ్చర్యపోయారు. తర్వాత కాళీ ఆలయానికి వెళ్తూ పక్కనున్న శిష్యుడితో ‘ఆహా! మహామాయ విలాసం ఎలా ఉంటుందో చూడు. ఈ దక్షిణేశ్వరం ఎక్కడా? 80 మైళ్ల దూరంలో ఉన్న మేనల్లుడి ఊరెక్కడా? దూడను ఇక్కడ పెంచుతాడట. అది పెద్దయ్యాక ఆ ఊరికి తోలుకెళ్లి పొలం దున్నిస్తాడట! ఆహా.. మనిషి దురాశ ఎంతటిది! స్వలాభం కోసం, స్వార్థప్రయోజనాల కోసం ఎన్ని పథకాలు వేసుకుంటారు! ఎన్నెన్ని పాట్లు పడుతుంటారు!’ అన్నారు. దురాశ దైవసన్నిధి నుంచి మనల్ని దూరం చేస్తుందంటూ హితవు పలికారు.

ప్రహ్లాద్‌