Farmer:ఏ పంటా మిగల్లేదు..
ఖరీఫ్ పంటల్లో ఒక్కటీ సరిగా చేతికొచ్చే పరిస్థితి లేదు. ఎకరాకు రూ.లక్ష పెట్టుబడిగా పెట్టి మిరప సాగు చేస్తే.. తామర పురుగుతో ఎకరాకు 2, 3 క్వింటాళ్లు దిగుబడి రావడమూ గగనమైంది. గులాబీ పురుగు ధాటికి పత్తిలో ఎకరాకు రూ.15 వేలకు పైగా నష్టం వస్తోంది. వేరుసెనగ వేస్తే.. పశువుల మేతకూ మిగల్లేదు. కంది అయినా బాగుంటుందనుకుంటే..
వేరుసెనగ, వరి, పత్తి, మిరప, కంది.. అన్నీ నష్టాలే
భారీ వర్షాలు, తెగుళ్లు, పురుగుల తాకిడే ప్రధాన కారణం
అన్నదాత నెత్తిన రూ.లక్షల్లో అప్పులు..
పెట్టుబడుల రూపంలోనే రూ.16 వేల కోట్లకు పైగా నష్టం
ఉత్పత్తి నష్టం రూ.20వేల కోట్ల పైనే
ఈనాడు - అమరావతి
ఖరీఫ్ పంటల్లో ఒక్కటీ సరిగా చేతికొచ్చే పరిస్థితి లేదు. ఎకరాకు రూ.లక్ష పెట్టుబడిగా పెట్టి మిరప సాగు చేస్తే.. తామర పురుగుతో ఎకరాకు 2, 3 క్వింటాళ్లు దిగుబడి రావడమూ గగనమైంది. గులాబీ పురుగు ధాటికి పత్తిలో ఎకరాకు రూ.15 వేలకు పైగా నష్టం వస్తోంది. వేరుసెనగ వేస్తే.. పశువుల మేతకూ మిగల్లేదు. కంది అయినా బాగుంటుందనుకుంటే.. వెర్రితెగులు ఆశించి కాయ కనిపించడం లేదు. వరిలో ఎకరాకు 30 బస్తాల పైన వస్తాయనుకుంటే 15 నుంచి 20 బస్తాల దిగుబడీ కనాకష్టమవుతోంది. ఇందులోనూ ఎకరానికి సగటున రూ.15 వేలకు పైనే నష్టం.. ఖరీఫ్లో భారీవర్షాలు, వరదలకు తోడు తెగుళ్లు, పురుగుతాకిడితో ప్రధాన పంటలన్నీ దెబ్బతిన్నాయి. ఒక పంట దెబ్బతింటే మరోదానిలో గట్టెక్కొచ్చనే ఆశలూ పోయి రైతులకు రూ.లక్షల్లో అప్పులు మిగిలాయి. ఖరీఫ్లో వరి, వేరుసెనగ, మిరప, పత్తి, కందితోపాటు మినుము, మొక్కజొన్న తదితర పంటల సాగులో సుమారుగా రూ.16 వేల కోట్ల పెట్టుబడిని కోల్పోతున్నారు. ఉత్పత్తి నష్టం రూ.20 వేల కోట్ల పైనే ఉంటోంది. ఖరీఫ్లో వేసిన మినుము, పెసరతోపాటు మొక్కజొన్న సాగులోనూ నష్టాలు తప్పలేదు. రబీలో వేసిన సెనగనూ నల్లతామర పురుగు ఆశించింది.
పొగాకుకు పేనుబంక వచ్చింది. ఒకే సీజన్లో పంటలన్నీ పోవడం మునుపెన్నడూ చూడలేదని.. దీన్ని విపత్తు అనాలా? ఉత్పాతం అనాలా? మా కర్మ ఇంతే అని సరిపెట్టుకోవాలా? అని రైతులు వాపోతున్నారు. దాదాపు పూర్తిస్థాయిలో పెట్టుబడి పెట్టాక.. పంట చేతికొచ్చే దశలో విపత్తులు విరుచుకుపడ్డాయి. తెగుళ్లు విజృంభించాయి. పురుగుల తాకిడి పెరిగింది. దీంతో అధికశాతం రైతులు పెట్టుబడి మొత్తం నష్టపోయారు. ఎవర్ని కదిల్చినా లక్షల్లో అప్పులపాలయ్యామనే ఆవేదనే వినిపిస్తోంది
85 శాతం పైగా చిన్న, సన్నకారు రైతులే..
సాగుదారుల్లో 85% పైగా చిన్న, సన్నకారు రైతులే ఉన్నారు. వడ్డీ వ్యాపారుల దగ్గర, బ్యాంకుల్లో బంగారం తాకట్టు పెట్టి అప్పులు తెచ్చి పంటలపై పెట్టారు. కౌలురైతులుగా మారిన వ్యవసాయ కూలీలూ.. పనులకు వెళ్లి సంపాదించుకున్న మొత్తాన్నీ పెట్టుబడిగా పెట్టారు. కౌలు కూడా ముందే చెల్లించారు. ఇప్పుడు రూపాయి చేతికొచ్చే పరిస్థితి లేదని, అప్పులు ఎలా తీర్చాలని కుంగిపోతున్నారు.
గులాబీ ‘కత్తి’
తొలకరి ప్రారంభంలోనే పత్తి క్వింటాలు రూ.7వేలకు పైగా చేరింది. అయినా గతేడాది భారీ వర్షాలతో కొందరు రైతులు ఎకరాకు రూ.15 వేల వరకు నష్టపోవడం, గులాబీ పురుగు తాకిడి గుర్తొచ్చి.. 2 లక్షల ఎకరాల సాగు తగ్గించారు. తొలితీత పత్తినే క్వింటాలు రూ.7 వేల వరకు అమ్మారు. అక్టోబరు నెలాఖరు వరకు అంతా బాగుంది. ఎకరాకు 8 నుంచి 10 క్వింటాళ్లు వస్తుందని ఆశించారు. ఇంతలోనే భారీ వర్షాలతో కాపు రాలిపోయింది. కాయలు చెట్టుకే కుళ్లిపోయాయి. అయినా మరో కాపు వస్తుందని భావిస్తుండగా గులాబీ పురుగు విజృంభించి, వచ్చేదంతా పుచ్చుపత్తి అయింది. దిగుబడి ఎకరాకు 2 నుంచి 3 క్వింటాళ్లు దాటలేదు. పెట్టుబడులు కూడా తిరిగిరాని పరిస్థితి తలెత్తింది.
* పంట: పత్తి
* సాగు విస్తీర్ణం: 13,04,557 ఎకరాలు
* దిగుబడి దెబ్బతిన్న విస్తీర్ణం అంచనా: 80%
* ఎకరాకు సగటు దిగుబడి: 10 క్వింటాళ్లు
* ప్రస్తుతం వస్తున్నది: 2-3 క్వింటాళ్లే
* పెట్టుబడి నష్టం: రూ.1,662 కోట్లు అంచనా (మొత్తం పెట్టుబడి ఎకరాకు రూ.30వేలు, నష్టం.. రూ.15,000)
పొలం అమ్మేశా.. ఇప్పుడు మళ్లీ అప్పులయ్యాయి
నాకు తెలిసిన విద్య వ్యవసాయమే అంటున్న ఈ రైతు పేరు కరీముల్లా.. గుంటూరు జిల్లా పుల్లడిగుంటకు చెందిన ఈయన రెండేళ్ల కిందటే వ్యవసాయంలో అప్పులు తీర్చడానికి ఉన్న ఎకరా పొలాన్ని అమ్మేశారు. ఇల్లొక్కటే మిగిలింది. ఈ ఏడాది ఎకరా రూ.40 వేల చొప్పున ఏడెకరాలు కౌలుకు తీసుకుని మిరప, ఎకరా రూ.25 వేల చొప్పున అయిదెకరాలు కౌలుకు తీసుకుని పత్తి వేశారు. మొత్తంగా రూ.10 లక్షల పెట్టుబడి అయింది. ఎకరానికి పది క్వింటాళ్లు వస్తుందనుకున్న పత్తి.. వానలు, గులాబీ పురుగుతో రెండు క్వింటాళ్లకు పడిపోయింది. నల్లతామర దెబ్బకు మిరపలో ఎకరాకు మూడు, నాలుగు క్వింటాళ్లూ కష్టమే. ‘బంగారం పెట్టి కొంత, నూటికి నెలకు రూ.2.50, రూ.2, రూ.1.50 వడ్డీకి మరికొంత అప్పు తెచ్చి పెట్టాం. వాటిని ఎలా తీర్చాలో అర్థం కావట్లేదు’ అని ఆయన కన్నీటి పర్యంతమయ్యారు.
పశువుల మేతకైనా మిగల్లేదు..
ఎకరా వేరుసెనగకు రూ.35 వేల పెట్టుబడి పెడితే.. కిలో కాయ కూడా రాని రైతులు వేలాది మంది ఉన్నారు. వేరుసెనగ కాయ కోశాక మిగిలిన కట్టెను పశువుల మేతగా వేస్తారు. భారీవర్షాలతో కట్టె నల్లగా మారి.. మేతకూ పనికిరాలేదు. పంటకోత ప్రయోగాల లెక్కల ఆధారంగా చూస్తే.. అనంతపురం జిల్లాలో ఎకరాకు 83 కిలోల దిగుబడి మాత్రమే వచ్చింది. నిరుడూ భారీవర్షాలతో వేరుసెనగ దెబ్బతిని, పెద్ద సంఖ్యలో నష్టపోయారు. అయినా పెట్టుబడి రాయితీ కొందరికి మాత్రమే అందిందని రైతులు చెబుతున్నారు. ఈ ఏడాదీ కోలుకోలేని దెబ్బతిన్నామని, సాగు విస్తీర్ణంలో 70% పైనే నష్టం జరిగిందని పేర్కొంటున్నారు.
* పంట: వేరుసెనగ
* సాగు విస్తీర్ణం: 16,47,052 ఎకరాలు
* దెబ్బతిన్న విస్తీర్ణం అంచనా: సుమారు 70%
* నష్టానికి కారణం: భారీ వర్షాలు
* సగటు దిగుబడి: అధికశాతం రైతులకు పంటకు చేతికే రాలేదు
* పెట్టుబడి నష్టం: రూ.2,882 కోట్లు అంచనా (ఎకరాకు రూ.25వేల చొప్పున)
పశువుల మేత కూడా మిగల్లేదు
- పసల రాము, రైతు, మేడాపురం, చెన్నేకొత్తపల్లి మండలం, అనంతపురం జిల్లా
అయిదెకరాల్లో వేరుసెనగకు రూ.2 లక్షల పెట్టుబడి అయింది. ఊడలు దిగినప్పట్నుంచే ఎడతెరిపిలేని వానలు పడ్డాయి. పంట సరిగా రాలేదు. కోత కోశాక 20 రోజులపాటు ఆగకుండా వర్షాలు కురిశాయి. కాసిన కొద్దిపాటి కాయలూ నల్లగా మారి మొలకలొచ్చాయి. కనీసం పశువుల మేత కూడా దక్కలేదు. ఇలాంటి పరిస్థితి ఎప్పుడూ లేదు.
తామర దెబ్బకు తలకిందులు
మిరపలో ఏటా వైరస్ ప్రభావం ఉంటుంది. ఒక్కోసారి మొక్క దశలోనే ఆశిస్తే.. కొన్నిసార్లు తొలి కాపు తర్వాత, రెండో కాపులో వస్తుంటుంది. దీంతో ఎకరాకు పది క్వింటాళ్ల లోపైనా చేతికొచ్చేది. ఈ ఏడాది రికార్డు స్థాయిలో సాగు చేశారు. డిసెంబర్ నాటికే ఎకరాకు రూ.లక్షకు పైగా పెట్టుబడి పెట్టారు. ఇంతలో జెమిని వైరస్ ఆశించి, కొంత నష్టపరిచింది. దీనికితోడు నల్లతామర పురుగు విజృంభించి మొత్తం పంటనే నాశనం చేసింది. పొలాల్లో పూత అనేదే కనిపించని పరిస్థితి. ఎకరాకు రూ.లక్ష వరకు రైతులు నష్టపోయారు. కౌలు రైతులకు ఎకరాకు రూ.30 వేలకు పైగా అదనపు నష్టం వాటిల్లింది. ఇప్పటికీ పురుగు నివారణ కాలేదు. సాగు చేసిన విస్తీర్ణంలో 80 నుంచి 85 శాతం మిరప దెబ్బతింది. మిరపలో గతేడాదీ వైరస్ ప్రభావంతో దిగుబడి తగ్గింది. ధరలు బాగుండటంతో రైతులు కొంత గట్టెక్కారు.
* పంట: మిరప
* సాగు విస్తీర్ణం: 5,13,000 ఎకరాలు
* దెబ్బతిన్న విస్తీర్ణం: సుమారు 85 శాతం
* ఎకరాకు సగటు దిగుబడి: 10 క్వింటాళ్లు
* ప్రస్తుతం వస్తున్నది: రెండు మూడు క్వింటాళ్లే
* పెట్టుబడి నష్టం: రూ.4,360 కోట్లు (ఎకరాకు రూ.లక్ష) అంచనా
నాలుగెకరాల మిరప.. రూ.5 లక్షల అప్పు
- జాగర్లమూడి శ్రీను, మక్కెనవారిపాలెం, సంతమాగులూరు మండలం, ప్రకాశం జిల్లా
నాలుగెకరాల్లో మిరప వేశాను. నల్లతామర పురుగుతో దెబ్బతింది. రెండెకరాల్లో పంట తీసేసి బెండ, మునగ పెట్టా. మిగిలిన రెండెకరాల్లోనూ.. ఎకరాకు రెండు, మూడు క్వింటాళ్లే వచ్చేట్లు ఉన్నాయి. కౌలుతో కలిపి నాలుగెకరాలకు రూ.6 లక్షల పెట్టుబడి అయింది. కాయలు అమ్మితే రూ.లక్ష వస్తాయేమో.
వెర్రి తెగులొచ్చి.. కంది పోయింది
భారీవర్షాలతో కందిలోనూ పూత రాలింది. మిగిలిన కొద్దిపాటి పూత అయినా నిలిస్తే ఎకరాకు రెండు, మూడు క్వింటాళ్లయినా కందులొస్తాయి అనుకుంటుండగా వెర్రితెగులు విరుచుకుపడి, కాపు అనేదే లేకుండా చేసింది. 70% విస్తీర్ణంలో దిగుబడుల్ని దెబ్బతీసింది. పెట్టిన పెట్టుబడి మొత్తం నష్టపోవాల్సి వస్తోంది. పూత ఎందుకు రావడం లేదో అర్థంకాక.. లీటర్ల కొద్దీ మందులు పిచికారీ చేస్తున్న రైతులకు పెట్టుబడి మరింత పెరుగుతోంది.
* పంట: కంది
* సాగు విస్తీర్ణం: 6,13,885 ఎకరాలు
* తెగులు, వర్షాలతో దెబ్బతిన్న విస్తీర్ణం అంచనా: సుమారు 60 శాతం పైనే
* ఎకరాకు సగటు దిగుబడి: 4 క్వింటాళ్లు
* ఇప్పుడు వస్తున్నది: క్వింటాలు లోపే
* పెట్టుబడి నష్టం: రూ.1,150 కోట్లు (ఎకరాకు రూ.25 వేల చొప్పున) అంచనా
కంది పంట నాశనం
- గాడపర్తి లక్ష్మినారాయణ, రైతు, శివరాంపురం, తాళ్లూరు మండలం, ప్రకాశం జిల్లా
వరిసాగులో నష్టాలొస్తున్నాయని అయిదెకరాల్లో కంది సాగు చేశా. రూ.75 వేల పైనే పెట్టుబడి పెట్టా. అధిక వర్షాలతో కొంత దెబ్బతింది. తెగుళ్లు పెరగడంతో.. ఎన్ని రకాల పురుగుమందులు వాడినా ఉపయోగం లేకపోయింది. మూడెకరాల కందిని గొర్రెల మేతకు ఇచ్చేశా. ఇంకో రెండెకరాల్లో ఉన్న కందికి వెర్రి తెగులు వచ్చింది. కాయ కూడా వచ్చే పరిస్థితి లేదు.
వరి రైతుకు మిగిలింది కన్నీరే
ఖరీఫ్ నుంచి విడవని వర్షాలే. అయినా తట్టుకుని వరి సాగు చేస్తే పంటకోత దశలో వానలు విరుచుకుపడ్డాయి. కొన్నిచోట్ల పంటను తుడిచిపెట్టేశాయి. మరికొన్ని ప్రాంతాల్లో వరిని నేల కరిపించాయి. వచ్చే దిగుబడితో పోలిస్తే.. కోత ఖర్చులే ఎక్కువవడంతో కొంతమంది కోయకుండా వదిలేశారు. కోసి ఆరబెట్టిన ధాన్యమూ తడిసి, నీటిలో నాని, రంగు మారింది. నూక శాతమూ పెరిగింది. మిల్లర్లు కొనడం లేదని రైతులు ఆవేదన చెందుతున్నారు. ధర వచ్చేవరకు ఎదురుచూద్దామంటే నిల్వ చేసుకునే చోటు లేక, రబీ పెట్టుబడులకు సొమ్ము అవసరమై అడిగిన ధరకు అమ్మాల్సి వస్తోందని వాపోతున్నారు. గతేడాది ఖరీఫ్లోనూ భారీవర్షాలకు రాష్ట్రంలో చాలాచోట్ల వరి దెబ్బతింది. ఈ ఏడాదీ తూర్పు, పశ్చిమగోదావరి, గుంటూరు, కృష్ణా, చిత్తూరు, తదితర జిల్లాల్లో భారీగా పంట వర్షార్పణమైంది.
* పంట: వరి
* సాగు విస్తీర్ణం: 39,15,205 ఎకరాలు
* పూర్తిగా, పాక్షికంగా దెబ్బతిన్న విస్తీర్ణం అంచనా: సుమారు 40%
* ఎకరాకు సగటు దిగుబడి: 35 బస్తాలు
* సగటున వస్తున్నది: 20 బస్తాలు
* పెట్టుబడి నష్టం: రూ.2,250 కోట్లు (ఎకరాకు రూ.15,000) అంచనా
పెట్టుబడి కూడా దక్కదు
-కొప్పినీడి సత్యనారాయణ, కౌలు రైతు, శివకోటి, రాజోలు మండలం, తూర్పుగోదావరి జిల్లా
కౌలుకు మూడెకరాలు సాగు చేశాను. తుపాను, వర్షాలకు చాలా వరకు పంట దెబ్బతినగా 50 బస్తాల ధాన్యం చేతికొచ్చింది. ఎకరాకు 30 వేలు పైనే ఖర్చు చేశాను. పెట్టుబడీ తిరిగివచ్చేలా లేదు. ఇలాంటి పరిస్థితి ఏనాడూ రాలేదు.
అన్ని పంటలకూ నష్టాలే మిగిలాయి
- కేవీవీ ప్రసాద్, రాష్ట్ర ప్రధాన కార్యదర్శి, ఏపీ రైతు సంఘం
సాగు చేసిన మిరపలో 95% వరకు నల్లతామర పురుగుతో దెబ్బతింది. వరి సాగు గిట్టుబాటు కాకపోవడంతో 25% మంది నాట్లే వేయలేదు. వేసిన పంటలోనూ ఎకరాకు 25 బస్తాలు మించి రావడం లేదు. వర్షాలతో కొంత తడిసింది. రంగు మారింది. యంత్రాలతో కోయించడంతో తేమ శాతం పెరిగింది. పత్తిలో గులాబీ పురుగు దెబ్బకు 70% పైనే నష్టం వస్తుంది. వేరుసెనగ 80% పైనే దెబ్బతింది. కందీ, మినుముకూ నష్టాలే. సెనగ, సుబాబుల్, జామాయిల్, సరుగుడులకు ధర లేదు.
Trending
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
మరిన్ని
-
TDP: ప్రతి గడపను తట్టినాదో అమ్మామాయమ్మ!.. నారా భువనేశ్వరిపై పాట ఆవిష్కరణ
పల్లెపల్లె తిరిగినాదో అమ్మా భువనమ్మ- ప్రతి గడపను తట్టినాదో అమ్మామాయమ్మ జనం గుండెల్లో కొలువైనాది.. కష్టాలు కన్నీళ్లు తుడిపేసింది. -
అన్నక్యాంటీన్ సేవలు ఆపాల్సిందే!.. ఎన్నికల కోడ్ అంటూ అధికారుల అభ్యంతరం
అధికార పార్టీ నేతల ఫొటోలు, హోర్డింగులు తొలగించడంలో చర్యలు తీసుకోని అధికారులు.. నిరుపేదల ఆకలి తీర్చే అన్నక్యాంటీన్కు మాత్రం నిబంధనలు వర్తిస్తాయంటూ అభ్యంతరం వ్యక్తం చేశారు. -
ఉత్తర కోస్తాలో రేపు భారీ వర్షాలు
ఉత్తర కోస్తాలోని ఒకటి, రెండు ప్రాంతాల్లో బుధవారం భారీ వర్షాలు కురవొచ్చని అమరావతి వాతావరణ కేంద్రం సంచాలకులు సోమవారం ఒక ప్రకటనలో తెలిపారు. -
ప్రధాని సభలో ఆ ముగ్గురు ఎస్పీలు ఏమైనట్లు?
తెదేపా, జనసేన, భాజపా కూటమి ఆధ్వర్యంలో ఆదివారం రాత్రి పల్నాడు జిల్లా బొప్పూడిలో జరిగిన ప్రజాగళం సభలో తోపులాటలు చోటుచేసుకుని ప్రధాని నరేంద్ర మోదీ ప్రసంగానికి అంతరాయం ఏర్పడిన ఘటనపై పోలీసులు మల్లగుల్లాలు పడుతున్నారు. -
రోజంతా ఆసుపత్రి గదిలో చిక్కుకుపోయిన 5 ఏళ్ల బాలుడు
మాటలు రాని, వినపడని ఓ అయిదేళ్ల చిన్నారి అనుకోని పరిస్థితుల్లో ఆసుపత్రి గదిలో ఒక రోజంతా బందీ అయిపోయిన ఘటన కర్నూలు జిల్లా సర్వజన ఆసుపత్రిలో జరిగింది. -
బోరు వేసుకుంటారా.. రూ. 10 వేలు కట్టండి
తిరుపతిలోని అధికార పార్టీ కార్పొరేటర్ల అసలు రంగును బయటపెడుతూ సోమవారం ఓ వీడియో సామాజిక మాధ్యమాల్లో వైరల్ అవుతోంది. -
ఐదేళ్లూ షాక్.. ఎన్నికలని బ్రేక్!
పాదయాత్ర పేరిట ఊరూవాడా తిరిగిన జగన్... విద్యుత్ ఛార్జీలపై అలవోకగా అబద్ధాలు వల్లెవేశారు. మాటల గారడీతో ప్రజలను బురిడీ కొట్టించారు. -
వైకాపా సైన్యం బరితెగింపు
ఎన్నికల సంఘం నిఘా పరిధిలో ఉన్నామన్న బెరుకు లేదు.. హైకోర్టు ఆదేశాలు ఉల్లంఘిస్తున్నామన్న అదురూ లేదు. -
వేతనాల చెల్లింపులపై నేడు ‘చివరి గ్రీవెన్స్ డే’
వేతనాల చెల్లింపులకు సంబంధించి ఎలాంటి సమస్యలున్నా జిల్లా కేంద్రాలలో మంగళవారం నిర్వహించే చివరి ‘గ్రీవెన్స్ డే’(వినతుల స్వీకరణ)లో పరిష్కరించుకోవాలని ఒప్పంద, పొరుగుసేవల ఉద్యోగులకు ఆరోగ్య, కుటుంబ సంక్షేమశాఖ కమిషనర్ జె.నివాస్ సూచించారు. -
జగన్పై పోస్టులో అభ్యంతరకర భాగాన్ని తొలగించండి
వైకాపా అధ్యక్షుడు జగన్పై తెదేపా ఎక్స్ ఖాతాలో ఉంచిన పోస్టులో అభ్యంతరకరమైన ఓ భాగాన్ని తొలగించాలంటూ రాష్ట్ర ప్రధాన ఎన్నికల అధికారి కార్యాలయం తెదేపా రాష్ట్ర అధ్యక్షుడు అచ్చెన్నాయుడికి సోమవారం లేఖ రాసింది. -
కక్షిదారులకు వెంటనే న్యాయం అందించాలి
న్యాయస్థానాల్లో కక్షిదారులకు వేగంగా న్యాయం జరిగేలా న్యాయవాదులు చొరవ తీసుకోవాలని గవర్నర్ జస్టిస్ అబ్దుల్ నజీర్ అన్నారు. -
ఓఎంఆర్ షీట్లో గల్లంతైన విద్యార్థిని పేరు
విద్యాశాఖ అధికారుల తీరుతో పదో తరగతి విద్యార్థిని అరగంటపాటు తల్లడిల్లాల్సి వచ్చింది. తిరుపతి నగరంలోని సత్యనారాయణపురం జిల్లా పరిషత్ ఉన్నత పాఠశాల విద్యార్థిని కె.వర్షిణి తనకు కేటాయించిన బైపాస్లోని రత్నం పరీక్షా కేంద్రం వద్దకు అరగంట ముందుగానే చేరుకుంది. -
కోడ్ కూసే ముందు.. అయినవారికే నిధులు
ఇప్పటికే పలు దఫాలు సీఎం జగన్ సొంత నియోజకవర్గం పులివెందుల, ఆర్థిక మంత్రి బుగ్గన రాజేంద్రనాథ్రెడ్డి ప్రాతినిధ్యం వహిస్తున్న డోన్ పరిధిలో రహదారుల పనులు చేసిన గుత్తేదార్లకు మాత్రమే చెల్లింపులు చేశారంటూ ఇతర ప్రాంతాలకు చెందిన కాంట్రాక్టర్లు గగ్గోలు పెడుతున్నారు. -
కాసులివ్వని కపట ప్రేమ!
పేరుకు ముఖ్యమంత్రి జగన్మోహన్రెడ్డి డబ్బులు జమ చేస్తున్నట్లు ప్రకటిస్తారు.. రైతులకు మాత్రం సున్నా వడ్డీ లేదు. పెట్టుబడి సాయమూ లేదు. -
గ్రహణం వీడితేనే గట్టెక్కేది!
చుట్టూ నీళ్లలో నిరుపయోగంగా ఉన్న ఈ నిర్మాణాలు టిడ్కో ఇళ్లు. ఒంగోలు నగరం సమీపంలోని చింతల వద్ద తెదేపా హయాంలో నిర్మించారు. -
ఈఏపీసెట్ పరీక్ష తేదీల్లో మార్పు
ఎన్నికల నేపథ్యంలో ఇంజినీరింగ్, వ్యవసాయ, ఫార్మసీ ప్రవేశాలకు నిర్వహించే ఉమ్మడి ప్రవేశ పరీక్ష ఏపీ ఈఏపీసెట్ పరీక్ష షెడ్యూల్ మారనుంది. -
ఉత్తుత్తి సంక్షేమం
‘గడప గడపకు సంక్షేమం’ పేరుతో వైకాపా ప్రభుత్వం పేదలను మోసం చేసేందుకు ప్రయత్నిస్తోంది. -
కోడ్ ఉల్లంఘన విచారణలో జాప్యం: కలెక్టర్ ఆగ్రహం
ఎన్నికల ప్రవర్తనా నియమావళిని ఉల్లంఘించిన వాలంటీర్ల వివరాల సేకరణలో జాప్యం జరగడంతో గుంటూరు జిల్లా కలెక్టర్ సిబ్బందిపై ఆగ్రహం వ్యక్తం చేశారు. -
ఇదేం సామాజిక న్యాయం జగన్?
వైకాపా ప్రకటించిన అభ్యర్థుల జాబితాలో సామాజిక న్యాయం నేతి బీర చందంగా ఉంది. రాయలసీమ నాలుగు జిల్లాలు, ఉమ్మడి నెల్లూరు జిల్లాను కలిపి వైకాపా టికెట్ల కేటాయింపు పరిశీలిస్తే.. జగన్ మార్క్ న్యాయం ఏమిటన్నది స్పష్టమవుతోంది. -
సీపీఎస్ ఉద్యోగుల డబ్బులు రూ.2,800 కోట్లు హాంఫట్
జగన్ సర్కార్ కాంట్రిబ్యూటరీ పెన్షన్ స్కీమ్ (సీపీఎస్) ఉద్యోగులపై కక్షకట్టినట్లు వ్యవహరిస్తోంది. -
ఆగని సలహాదారు నియామకాల జోరు
ప్రభుత్వశాఖలకు సలహాదారుల నియామకంపై హైకోర్టు అభ్యంతరం చెప్పినా జగన్ ప్రభుత్వ తీరు మారడంలేదు.
తాజా వార్తలు (Latest News)
-
CAA: సీఏఏపై స్టే కోరుతూ పిటిషన్లు.. కేంద్రానికి మూడు వారాల గడువిచ్చిన సుప్రీం
-
Sita Soren: జేఎంఎంకు షాక్..! భాజపాలోకి శిబూ సోరెన్ పెద్ద కోడలు
-
Mumbai Indians: హార్దిక్.. అంత వీజీ కాదు
-
తెలంగాణ నూతన గవర్నర్గా బుధవారం బాధ్యతలు స్వీకరించనున్న రాధాకృష్ణన్
-
Nitin Gadkari: అమితాబ్ సినిమా మూడుసార్లు చూశా: గడ్కరీ ఆసక్తికర వ్యాఖ్యలు
-
IMD: తెలంగాణలో రెండ్రోజులపాటు వర్షాలు