WPI inflation: జులైలో టోకు ద్రవ్యోల్బణం 11.16 శాతం!

దిల్లీ: టోకు ధరల ఆధారిత ద్రవ్యోల్బణం సూచీ(డబ్ల్యూపీఐ) జులైలో స్వల్పంగా తగ్గి 11.16 శాతానికి పరిమితమైంది. అయితే, వరుసగా నాలుగో నెలా ద్రవ్యోల్బణం రెండంకెల్లో నమోదుకావడం గమనార్హం. 2020 జులైలో డబ్ల్యూపీఐ -0.25 శాతంగా ఉంది. ఈ ఏడాది మేలో ఇది రికార్డు స్థాయిలో గరిష్ఠంగా 12.94 శాతంగా నమోదైంది. ఆహార పదార్థాల ద్రవ్యోల్బణం జూన్‌లో 3.09 శాతంగా ఉండగా.. జులైలో అది సున్నా శాతానికి పరిమితమవడం గమనార్హం. ఉల్లి ధర పెరిగినప్పటికీ.. ఆహార పదార్థాల ద్రవ్యోల్బణం తగ్గడం విశేషం. ఉల్లి ధరల ద్రవ్యోల్బణం 72.01 శాతానికి చేరింది. ముడి చమురు, సహజవాయు విభాగాల ద్రవ్యోల్బణం 36.34 శాతం నుంచి పెరిగి 40.28 శాతానికి పరిమితమైంది. తయారీ వస్తువుల ద్రవ్యోల్బణ రేటు జులైలో 11.20 శాతంగా నమోదైంది. అంతకుముందు నెలలో ఇది 10.88 శాతంగా ఉంది.