TikTok: పాకిస్థాన్‌లో టిక్‌టాక్‌పై నిషేధం ఎత్తివేత

ఇస్లామాబాద్‌: ప్రపంచవ్యాప్తంగా విశేష ఆదరణ పొందిన ప్రముఖ వీడియో షేరింగ్‌ యాప్‌ టిక్‌టాక్‌పై విధించిన నిషేధాన్ని పాకిస్థాన్ ఎత్తివేసింది. ఈ యాప్‌లో అనుచిత సమాచారం వ్యాప్తి అవుతోందన్న ఆరోపణల నేపథ్యంలో గత జులై 20న నిషేధం విధించారు. మరోసారి ఇలాంటి ఘటనలు పునరావృతం కావని హామీ ఇవ్వడంతో టిక్‌టాక్‌పై నిషేధం ఎత్తివేస్తున్నామని పాకిస్థాన్‌ టెలికమ్యూనికేషన్‌ అథారిటీ(పీటీఏ) ప్రకటించింది. అనైతిక, అనుచిత సమాచారం ఇకపై వ్యాప్తి కాబోదని.. అందుకు పటిష్ఠ చర్యలు చేపడతామని టిక్‌టాక్ హామీ ఇచ్చినట్లు తెలిపింది. ఈ యాప్‌పై పాక్‌ నిషేధం విధించి ఎత్తివేయడం ఇది నాలుగోసారి కావడం గమనార్హం. భారత్‌లోనూ టిక్‌టాక్‌పై నిషేధం కొనసాగుతున్న విషయం తెలిసిందే.