Airtel 5g: నెల రోజుల్లోనే 10 లక్షల మందికి 5జీ.. ఎయిర్‌టెల్‌ మైలురాయి

ఇంటర్నెట్‌ డెస్క్‌: దేశంలో 5జీ సేవలను ప్రారంభించిన కొద్ది రోజుల్లోనే ఎయిర్‌టెల్‌ ఓ మైలురాయిని చేరుకుంది. తమ 5జీ సేవల్లో 10 లక్షల మంది యునిక్‌ యూజర్లు భాగమైనట్లు ఎయిర్‌టెల్‌ ఓ ప్రకటనలో తెలిపింది. 5జీ సేవలను ప్రారంభించిన నెల రోజుల్లోపే ఈ ఘనతను సాధించినట్లు కంపెనీ పేర్కొంది. హైదరాబాద్‌, దిల్లీ, ముంబయి, చెన్నై, బెంగళూరు, సిలిగుడి, నాగ్‌పూర్‌, వారణాశి నగరాల్లో 5జీ ప్లస్‌ పేరిట ఎయిర్‌టెల్‌ 5జీ సేవలను ప్రారంభించిన సంగతి తెలిసిందే. ఆయా నగరాల్లో దశలవారీగా నెట్‌వర్క్‌ను విస్తరిస్తున్నారు. ఈ క్రమంలోనే 10 లక్షలమంది తమ 5జీ నెట్‌వర్క్‌ను వినియోగిస్తున్నట్లు ఎయిర్‌టెల్‌ పేర్కొంది.

ఎయిర్‌టెల్‌ 5జీ సేవలనూ ప్రస్తుతం ప్రతిరోజూ విస్తరిస్తూ ముందుకెళుతున్నామని ఆ కంపెనీ సీటీఓ రణ్‌దీప్‌ సెకాన్‌ తెలిపారు. కొన్ని డివైజులు మినహాయిస్తే దాదాపు అన్ని పరికరాల్లో తమ 5జీ నెట్‌వర్క్‌ అందుబాటులోకి వచ్చిందని చెప్పారు. దేశవ్యాప్తంగా సేవలందించేందుకు వేగంగా అడుగులు వేస్తున్నామని పేర్కొన్నారు. సేవలను ప్రారంభించిన కొద్ది రోజుల్లోనే ఈ స్థాయిలో స్పందన రావడం తమకు ప్రోత్సాహకరంగా ఉందని తెలిపారు. మరోవైపు ఇప్పుడున్న ప్లాన్లతోనే హైస్పీడ్‌ 5జీ సేవలను ఆనందించొచ్చని కంపెనీ చెబుతోంది. ఇందుకోసం సిమ్‌ కార్డు సైతం మార్చాల్సిన అవసరం లేదని తెలిపింది. కేవలం 5జీ నెట్‌వర్క్‌ను సపోర్ట్‌ చేసే మొబైల్‌ ఉంటే సరిపోతుందని పేర్కొంది.