Asian Paints Q3 Results: ఏషియన్‌ పెయింట్స్‌ లాభం రూ.1,097 కోట్లు

దిల్లీ: అక్టోబరు-డిసెంబరు త్రైమాసికానికి ఏషియన్‌ పెయింట్స్‌ (Asian Paints Q3 Results) ఏకీకృత ప్రాతిపదికన రూ.1,097.06 కోట్ల నికర లాభాన్ని ఆర్జించింది. 2021-22 ఇదే త్రైమాసిక లాభం రూ.1,031.29 కోట్లతో పోలిస్తే ఈసారి 6.4 శాతం పెరిగింది. కార్యకలాపాల ఆదాయం రూ.8,527.24 కోట్ల నుంచి రూ.8,636.74 కోట్లకు పెరిగింది. మొత్తం వ్యయాలు రూ.7,220.29 కోట్ల నుంచి రూ.7,280.75 కోట్లకు చేరాయి.

దేశీయ డెకరేటివ్‌ వ్యాపారంలో అమ్మకాలు ఫ్లాట్‌గా నమోదయ్యాయని క్రితం ఏడాది అధికంగా పెరిగిన ధరల ప్రాతిపదికే ఇందుకు కారణమని ఏషియన్‌ పెయింట్స్‌ (Asian Paints) మేనేజింగ్‌ డైరెక్టర్‌, సీఈఓ అమిత్‌ సింఘాల్‌ తెలిపారు. అక్టోబర్ వరకు రుతుపవనాలు కొనసాగడం పండుగ సీజన్‌లో రిటైల్‌ విక్రయాలను ప్రభావితం చేశాయన్నారు. తిరిగి నవంబర్, డిసెంబరులో డిమాండ్ పుంజుకున్నట్లు వెల్లడించారు. డిసెంబరు నెలలో డెకరేటివ్‌ వ్యాపారంలో రెండంకెల వృద్ధి నమోదైనట్లు పేర్కొన్నారు.

మరోవైపు, ఆటోమొబైల్ ఒరిజినల్ ఎక్విప్‌మెంట్, సాధారణ పారిశ్రామిక విభాగాల్లో బలమైన వృద్ధి కారణంగా బిజినెస్‌ విభాగంలో వ్యాపారం బాగానే సాగిందని సింఘల్‌ తెలిపారు. అంతర్జాతీయ వ్యాపారం విషయానికి వస్తే.. పశ్చిమాసియా, ఆఫ్రికాలో మంచి వృద్ధి నమోదైనట్లు పేర్కొన్నారు. శ్రీలంక, బంగ్లాదేశ్‌లో ప్రతికూల ఫారెక్స్, స్థూల- ఆర్థిక పరిస్థితుల కారణంగా దక్షిణాసియా మార్కెట్‌ తీవ్రంగా ప్రభావితమైనట్లు తెలిపారు.