Bank of Baroda: అన్ని రకాల చెల్లింపులకు ఒకే కార్డ్‌..

Bank of Baroda | ఇంటర్నెట్‌డెస్క్‌: అన్ని రకాల చెల్లింపులకు ఒకే కార్డు ఉండాలనే ఉద్దేశంతో ప్రభుత్వ రంగానికి చెందిన బ్యాంక్‌ ఆఫ్‌ బరోడా (Bank of Baroda) కీలక నిర్ణయం తీసుకుంది. నేషనల్‌ కామన్‌ మొబిలిటీ కార్డ్‌ (NCMC) రూపే రీలోడబుల్‌ ప్రీపెయిడ్‌ కార్డ్‌ను తీసుకొచ్చింది. ఈ విషయాన్ని బీఓబీ మంగళవారం ప్రకటించింది. ‘వన్‌ నేషన్‌, వన్‌ కార్డ్‌’ చొరవతోనే దీన్ని తీసుకొచ్చినట్లు పేర్కొంది.

బీఓబీ తీసుకొచ్చిన ఎన్‌సీఎమ్‌సీతో మెట్రో, బస్సు, రైలు, క్యాబ్ ప్రయాణాల టికెట్లను కొనుగోలు చేయొచ్చు. టోల్‌, పార్కింగ్‌ లాంటి సమయంలోనూ ఈ కాంటాక్ట్‌లెస్‌ ప్రీపెయిడ్‌ కార్డ్‌ ఉపయోగపడుతుందని బ్యాంక్‌ తెలిపింది. ఏటీఎం విత్‌డ్రాతో పాటూ POS (పాయింట్ ఆఫ్ సేల్), ఈ-కామర్స్ చెల్లింపుల కోసం కూడా ఈ కార్డును ఉపయోగించవచ్చని ప్రకటించింది. బ్యాంక్‌ ఆఫ్‌ బరోడా కస్టమర్లకే కాకుండా ఇతరులు కూడా రియల్‌టైమ్‌ వినియోగం కోసం వెంటనే యాక్టివేట్‌ చేయించుకోవచ్చని పేర్కొంది.

గూగుల్‌ మ్యాప్స్‌ కొత్త ఫీచర్‌.. వాట్సాప్‌ లేకుండానే రియల్‌ టైమ్‌ లొకేషన్‌ షేర్‌..

ఆన్‌లైన్‌, ఆఫ్‌లైన్‌ లావాదేవీలకు ఈ కార్డ్‌ సపోర్ట్‌ చేస్తుందని బీఓబీ తెలిపింది. ఆన్‌లైన్‌ వాలెట్ బ్యాలెన్స్‌ గరిష్ఠంగా రూ.లక్ష వరకు, ఆఫ్‌లైన్‌ వాలెట్‌లో అయితే రూ.2వేలుగా పరిమితిని నిర్ణయించింది. బ్యాంక్‌ ప్రత్యేక పోర్టల్‌ ద్వారా కార్డు దారులు డబ్బును లోడ్‌/రీలోడ్‌ చేసుకోవచ్చు. ఈ కార్డుకు సంబంధించిన అన్ని లావాదేవీలు రిజిస్టర్‌ మొబైల్‌ నెంబర్‌కు ఎస్సెమ్మెస్‌ రూపంలో అందుతాయి.