CBI: గెయిల్‌ ఎగ్జిక్యూటివ్‌ డైరెక్టర్‌ను అరెస్ట్‌ చేసిన సీబీఐ

దిల్లీ: ప్రభుత్వ రంగ సంస్థ గెయిల్‌ (GAIL) ఎగ్జిక్యూటివ్‌ డైరెక్టర్‌ కె.బి.సింగ్‌ను సీబీఐ (CBI) అరెస్ట్‌ చేసింది. రూ.50 లక్షలు లంచం తీసుకున్నట్లుగా వచ్చిన ఆరోపణల నేపథ్యంలో ఆయన్ని అదుపులోకి తీసుకుంది. గ్యాస్‌ పైప్‌లైన్‌ ప్రాజెక్టుల కేటాయింపులో కొంతమంది కాంట్రాక్టర్లకు మేలు చేయడం కోసం ఆయన ముడుపులు స్వీకరించారనే ఆరోపణలు ఉన్నాయి.

కె.బి.సింగ్‌తో పాటు మరో నలుగురిని కూడా అరెస్ట్‌ చేసినట్లు సీబీఐ (CBI) అధికారులు తెలిపారు. వీరిలో వడోదర కేంద్రంగా పనిచేస్తున్న అడ్వాన్స్‌ ఇన్‌ఫ్రాస్ట్రక్చర్స్‌ డైరెక్టర్‌ సురేందర్‌ కుమార్‌ కూడా ఉన్నారు. శ్రీకాకుళం నుంచి అంగుల్‌, విజయ్‌పూర్‌ నుంచి ఔరైయా వరకు వేస్తున్న పైప్‌లైన్‌ ప్రాజెక్టుల విషయంలో ముడుపులు చేతులు మారినట్లు సీబీఐకి సమాచారం అందింది. వీటి ఆధారంగా సోమవారం నుంచి పలు ప్రాంతాల్లో అధికారులు సోదాలు చేపట్టి వీరిని అదుపులోకి తీసుకున్నారు. దిల్లీ, నోయిడా, విశాఖపట్నంలో ఇంకా సోదాలు కొనసాగుతున్నాయి.