జియో ఫైనాన్షియల్‌ @ రూ.1,66,000 కోట్లు

మార్కెట్‌ విలువ పరంగా దేశంలో 32వ స్థానం
అదానీ పోర్ట్స్‌- గ్రీన్‌, ఐఓసీ,  కోల్‌ ఇండియా కంటే ఎగువనే

దిల్లీ: రిలయన్స్‌ ఇండస్ట్రీస్‌ లిమిటెడ్‌ (ఆర్‌ఐఎల్‌) నుంచి విభజించిన ఆర్థిక సేవల విభాగం జియో ఫైనాన్షియల్‌ సర్వీసెస్‌ లిమిటెడ్‌ (జేఎఫ్‌ఎస్‌ఎల్‌) మార్కెట్‌ విలువ రూ.1,66,000 కోట్లుగా (20 బిలియన్‌ డాలర్లు) తేలింది. ఆర్‌ఐఎల్‌ షేర్లకు గురువారం ఎన్‌ఎస్‌ఈలో గంట పాటు (ఉదయం 9-10 మధ్య) నిర్వహించిన ప్రత్యేక ప్రీ ఓపెన్‌ సెషన్‌లో జేఎఫ్‌ఎస్‌ఎల్‌ షేరు స్థిర విలువను రూ.261.85గా నిర్థారించారు. రిలయన్స్‌ షేరు బుధవారం ముగింపు ధర రూ.2,841.85 కాగా; గురువారం ప్రత్యేక ప్రీ ఓపెన్‌ సెషన్‌ ముగింపు విలువ రూ.2,580. ఈ రెండింటి మధ్య వ్యత్యాసాన్నే జేఎఫ్‌ఎస్‌ఎల్‌ విలువగా నిర్థారించారు. ఒక్కో షేరుకు రూ.261.85 విలువ వద్ద జేఎఫ్‌ఎస్‌ఎల్‌ మొత్తం మార్కెట్‌ విలువ రూ.1,66,000 కోట్లుగా అవుతుంది. ఈ ప్రకారం చూస్తే.. మార్కెట్‌ విలువపరంగా దేశంలో 32వ స్థానంలో ఇది నిలిచింది. విశ్లేషకుల అంచనా వేసిన రూ.160-190 కంటే అధికంగానే జేఎఫ్‌ఎస్‌ఎల్‌ షేరుకు విలువ రావడం గమనార్హం.

* ఈనెల 20ని రికార్డు తేదీగా ప్రకటించినందున, ఆ తేదీ కల్లా ఖాతాల్లో ఉన్న ప్రతి ఆర్‌ఐఎల్‌ షేరుకు ఒక జేఎఫ్‌ఎస్‌ఎల్‌ షేరు లభిస్తుంది. జేఎఫ్‌ఎస్‌ఎల్‌ షేర్లు త్వరలోనే స్టాక్‌   ఎక్స్ఛేంజీల్లో ట్రేడింగ్‌కు అందుబాటులోకి వస్తాయి.

* అదానీ గ్రూపు సంస్థలైన అదానీ పోర్ట్స్‌, అదానీ గ్రీన్‌; టాటా స్టీల్‌, కోల్‌ ఇండియా, హెచ్‌డీఎఫ్‌సీ లైఫ్‌, ఐఓసీ, బజాజ్‌ ఆటోల కంటే కూడా జేఎఫ్‌ఎస్‌ఎల్‌ మార్కెట్‌ విలువే ఎక్కువగా ఉంది. ఇకపై ఆర్‌ఐఎల్‌ షేరు, తన ఆర్థిక సేవల విభాగం లేకుండానే ట్రేడ్‌ అవుతుంది.