ఆ డిస్కమ్‌లతో లావాదేవీలు నిలిపివేయండి.. ఇంధన ఎక్స్ఛేంజీలకు కేంద్రం లేఖ!

దిల్లీ: జన్‌కోలకు బకాయిలు చెల్లించని డిస్కమ్‌లతో లావాదేవీలు నిలిపివేయాలని ఇంధన ఎక్స్ఛేంజీలను కేంద్రం ఆదేశించింది. 13 రాష్ట్రాల్లోని 27 డిస్కమ్‌లకు లావాదేవీలు నిలిపివేయాలని సూచించింది. ఈ మేరకు ఇండియన్‌ ఎనర్జీ ఎక్స్ఛేంజ్‌ (IEX), పవర్‌ ఎక్స్ఛేంజ్‌ ఆఫ్‌ ఇండియా (PXIL), హిందుస్థాన్‌ పవర్‌ ఎక్స్ఛేంజ్‌ (HPX)లకు ఇంధన మంత్రిత్వశాఖ పరిధిలో గల ప్రభుత్వ రంగ సంస్థ అయిన పవర్‌ సిస్టమ్‌ ఆపరేషన్‌ కార్పొరేషన్‌ లిమిటెడ్‌ (POSOCO) సూచించింది. ఈ జాబితాలో తెలుగు రాష్ట్రాలకు చెందిన డిస్కమ్‌లు కూడా ఉన్నాయి.

ఆగస్టు 19 నుంచి లావాదేవీలు నిలిపివేయాలని ఇంధన ఎక్స్ఛేంజీలకు పోసోకో సూచించింది. తదుపరి ఆదేశాలు ఇచ్చేవరకు దీన్ని కొనసాగించాలని సూచించింది. ప్రాప్తి పోర్టల్‌లో ఉన్న బకాయిల వివరాల ఆధారంగా ఈ నిర్ణయం తీసుకున్నట్లు తన లేఖలో పేర్కొంది. ఈ ఏడాది జూన్‌లో ఇంధన మంత్రిత్వ శాఖ నోటిఫై చేసిన ఎలక్ట్రిసిటీ రూల్స్‌, 2022 కింద ఈ నిర్ణయం తీసుకున్నట్లు తెలుస్తోంది. దీని ప్రకారం బకాయిలు, ఇతర ఛార్జీలు చెల్లించకపోతే ఆ డిస్కమ్‌లను లావాదేవీలు జరపకుండా నిషేధించొచ్చు. పోసోకో పేర్కొన్న 13 రాష్ట్రాల్లో ఏపీ, తెలంగాణతోపాటు మహారాష్ట్ర, మధ్యప్రదేశ్‌, రాజస్థాన్‌, కర్ణాటక, తమిళనాడు, బిహార్‌, ఛత్తీస్‌గఢ్‌, ఝార్ఖండ్‌కు చెందిన డిస్కమ్‌లూ ఉన్నాయి. సాధారణంగా విద్యుత్‌కు డిమాండు పెరిగినప్పుడు రోజూవారీ అవసరాలకు ఐఈఎక్స్‌లో డిస్కమ్‌లు విద్యుత్‌ను కొనుగోలు చేస్తుంటాయి.