లారీ, కారు ఢీ.. ఒకరు మృతి

మరొకరికి తీవ్రగాయాలు

నుజ్జయిన కారు నుంచి క్షతగాత్రుడిని బయటకు తీస్తున్న స్థానికులు

చౌటకూర్‌, జోగిపేట టౌన్‌, న్యూస్‌టుడే: లారీ, కారు ఢీకొన్న ప్రమాదంలో చికిత్స పొందుతూ ఒకరు మృతి చెందగా, మరొకరికి తీవ్రగాయాలయ్యాయి. ఈ సంఘటన ఆదివారం చౌటకూర్‌ మండలం సరాఫ్‌పల్లి శివారు నాందేడ్‌-అకోలా జాతీయ రహదారిపై చోటుచేసుకుంది. పుల్కల్‌ ఎస్సై గణేష్‌ తెలిపిన ప్రకారం.. గుజరాత్‌కు చెందిన విష్ణుబాయి పాటిల్‌ (60), నవనీర్‌ కారులో జోగిపేట నుంచి సంగారెడ్డి బయలు దేరారు. ఈ క్రమంలో సరాఫ్‌పల్లి శివారులోని లిక్కర్‌ కంపెనీ వద్దకు రాగానే ఎదురుగా వస్తున్న లారీ, వీరు ప్రయాణిస్తున్న కారు ఎదురెదురుగా ఢీకొన్నాయి. ఈ ప్రమాదంలో కారు  నుజ్జయి ఇద్దరికీ గాయాలయ్యాయి. వీరిని సంగారెడ్డిలోని ప్రభుత్వ ఆసుపత్రికి, అనంతరం హైదరాబాద్‌లోని ఓ ప్రైవేట్‌ ఆసుపత్రికి తరలించారు. అక్కడే చికిత్స పొందుతూ విష్ణుబాయి పాటిల్‌ మృతిచెందాడు. కుటుంబ సభ్యులు ఇచ్చిన ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు ఎస్సై తెలిపారు. జాతీయ రహదారిపై ప్రమాద సూచిక నామపలకాలను ఏర్పాటు చేయకుండా రోడ్డు నిర్మాణం కొనసాగిస్తుండడంతో ప్రమాదాలు చోటుచేసుకుంటున్నాయని స్థానికులు తెలిపారు.