Nizamabad: ప్రైవేటు బస్సులో రూ.12.80 లక్షలు చోరీ

నిజామాబాద్‌ నేర విభాగం: జిల్లా కేంద్రంలోని ఆరో పట్టణ పోలీస్‌ స్టేషన్‌ పరిధిలో భారీ చోరీ జరిగింది. ప్రైవేటు బస్సులో ప్రయాణిస్తోన్న ఓ వ్యక్తి నుంచి దుండగులు రూ.12.80లక్షలు అపహరించారు.  ముంబయి నుంచి జగిత్యాలకు వచ్చే ప్రైవేటు బస్సులో జగిత్యాలకు చెందిన హనుమంతు ప్రయాణిస్తున్నాడు. నిజామాబాద్‌ శివారులోని సారంగాపూర్‌లో వద్ద టీ తాగడానికి బస్సు ఆపారు. ఇదే అదునుగా దుండగులు బాధితుడి నగదు బ్యాగును చోరీ చేశారు. బస్సులో సీసీ కెమెరాలు ఉన్నప్పటికీ చేయి అడ్డుపెట్టి చోరీ చేసినట్లు పోలీసులు తెలిపారు. చోరీకి గురైన బ్యాగ్‌లో రూ.12.80 లక్షలు ఉన్నట్లు బాధితుడు తెలిపాడు. బాధితుడి ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్సై మొగులయ్య తెలిపారు.