Kadapa: కత్తితో పొడిచాడు.. ఆపై ఆస్పత్రికి తీసుకెళ్లాడు

కడప (నేరవార్తలు): కడప పాత బైపాస్‌ వద్ద దారుణ హత్య జరిగింది. తీసుకున్న అప్పు తిరిగి ఇవ్వలేదని సాయికిరణ్‌ అనే వ్యక్తిని కడపకు చెందిన మహేశ్‌ కత్తితో పొడిచాడు. ఆదివారం అర్ధరాత్రి దాటాక ఈ హత్య జరిగింది. గడిచిన 24 గంటల్లో ఇది రెండో హత్య కావడం గమనార్హం. ఆదివారం నగరంలోని ఎల్‌ఐసీ కార్యాలయంలో భవానీ శంకర్ అనే వ్యక్తి హత్యకు గురైన విషయం తెలిసిందే. 

వైఎస్సార్‌ జిల్లా ఒంటిమిట్ట మండలానికి చెందిన సాయికిరణ్ కడపలోని ఓ ప్రైవేట్ షోరూంలో పనిచేస్తున్నాడు. సాయి కిరణ్ కడపకు చెందిన మహేశ్‌ నుంచి ₹50వేలు అప్పు తీసుకున్నాడు. ఇది తిరిగి చెల్లించే విషయంలో ఇద్దరి మధ్య ఆదివారం వాగ్వాదం జరిగింది. ఈ క్రమంలో కోపోద్రిక్తుడైన మహేశ్‌ తన వద్ద ఉన్న కత్తితో సాయికిరణ్‌ను పొడిచాడు. తర్వాత మహేశే స్వయంగా బాధితుడిని తన వాహనంలో ప్రైవేట్ ఆసుపత్రికి తీసుకెళ్లాడు. అయితే అప్పటికే సాయికిరణ్‌ మృతి చెందినట్లు వైద్యులు ధ్రువీకరించారు. దీంతో నిందితుడు పోలీసులకు లొంగిపోయాడు. ఈ ఘటనపై చిన్న చౌక్ పోలీసులు కేసు నమోదు చేసి దర్యాప్తు చేపట్టారు.