మనుబోలు-నెల్లూరు మార్గం విద్యుదీకరణ పూర్తి

అందుబాటులోకి వచ్చిన కొత్త రైల్వే లైన్‌

రైల్వేస్టేసన్‌ (విజయవాడ), న్యూస్‌టుడే : మూడో లైను పనుల్లో భాగంగా విజయవాడ డివిజన్‌ పరిధిలోని మనుబోలు-నెల్లూరు రైల్వేస్టేషన్ల మధ్య 29.3 కిమీ విద్యుదీకరణ పూర్తయి సోమవారం నుంచి కార్యకలాపాలు ప్రారంభమయ్యాయి. ప్రస్తుత ఆర్థిక సంవత్సరంలో దక్షిణ మధ్య రైల్వే జోన్‌ పరిధిలో మౌలిక సదుపాయాలకు పెద్దపీట వేస్తూ విద్యుదీకరణతో పాటు డబ్లింగ్‌, ట్రిప్లింగ్‌కు ప్రాధాన్యం ఇస్తూ ఈ పనులు చేపట్టింది. తీర ప్రాంతం వెంబడి గ్రాండ్‌ ట్రంక్‌ మార్గంలో ప్రయాణికుల రద్దీని తగ్గించడంలో ఇది దోహదపడనుంది. ప్రయాణికులు, సరకు రవాణా రైళ్లు పెరగడంతో కీలకమైన ఈ మార్గం అత్యంత రద్దీగా మారింది. ఈ సెక్షన్‌లో రద్దీని తగ్గించేందుకు విజయవాడ-గూడూరు మూడో లైను ప్రాజెక్టులో భాగంగా 2015-16 సంవత్సరంలో 288కిమీ దూరానికి రూ.3246 కోట్ల నిధులు మంజూరయ్యాయి. ఈ సెక్షన్ల మధ్య ఉత్తర, తూర్పు ప్రాంతాలను దక్షిణాది రాష్ట్రాలతో అనుసంధానించడంలో ఈ మార్గం కీలక పాత్ర పోషిస్తుంది. ఆర్‌వీఎన్‌ఎల్‌ సంస్థ ఈ పనులు చేపట్టింది. ప్రాజెక్టులో భాగంగా అన్ని పనులను ఏకకాలంలో చేపట్టారు. ఇప్పటి వరకు ఉలవపాడు-కావలి మధ్య 29 కిమీ దూరం, తలమంచి-బిట్రగుంట-శ్రీవెంకటేశ్వరపాలెం మధ్య 24.8కిమీ, కావలి-శ్రీవెంకటేశ్వరపాలెం మధ్య రూ.12.2కిమీ, తలమంచి-నెల్లూరు మధ్య 17కిమీ, కరవడి-చినగంజాం మధ్య 23.5 కిమీ మేర పనులు పూర్తయ్యాయి. ప్రస్తుతం మనుబోలు-నెల్లూరు మధ్య 29.3కిమీ పనులు పూర్తి చేయడంతో విజయవాడ,గూడూరు సెక్షన్‌లో మొత్తం 135.8కిమీ పూర్తయి ప్రాంభించడం జరిగింది. ఈ మార్గంలో పనులను నిర్ణీత వ్యవధిలోనే పూర్తి చేసిన ఆర్‌వీఎన్‌ఎల్‌, విజయవాడ డివిజన్‌ అధికారులను రైల్వే జీఎం అరుణ్‌కుమార్‌జైన్‌ అభినందించారు. విజయవాడ-గూడూరు మూడో లైనును అత్యధిక ప్రాధాన్యతతో చేపడుతున్నామని అన్ని సెక్షన్లలో పనులు ఏకకాలంలో వేగంగా జరుగుతున్నాయన్నారు. మూడో లైను ప్రాజెక్టులో భాగంగా ఈ ఆర్థిక సంవత్సరంలో మరిన్ని విభాగాలను ప్రారంభించేందుకు ప్రణాళికలు రూపొందిస్తున్నట్లు ఆయన పేర్కొన్నారు.