కిడ్నీ బాధితులను సీఎం ఆదుకోరా?

బాధితుడి ఇంటి వద్ద మాట్లాడుతున్న బాబూరావు, నాయకులు

ఎ.కొండూరు, న్యూస్‌టుడే: తిరువూరు సభలో ప్రతిపక్షాలపై నిందలు వేయడంపై దృష్టి పెట్టిన సీఎం జగన్‌ కిడ్నీ బాధితులను ఆదుకోవడంపై స్పందించలేదని సీపీఎం కార్యదర్శి వర్గ సభ్యుడు సీహెచ్‌ బాబూరావు మండిపడ్డారు. ఎ.కొండూరు, చైతన్యనగర్‌ తండాల్లో బుధవారం పార్టీ నాయకులతో కలిసి పర్యటించారు. కిడ్నీ రోగుల సమస్యలు తెలుసుకున్నారు. గతేడాది డిసెంబరు 28న కిడ్నీ వ్యాధితో మృతి చెందిన భూక్యా సీతమ్మ మట్టి ఖర్చుల నిమిత్తం ఇచ్చిన రూ.10 వేలను అధికారులు వెనక్కి తీసుకున్నారని ఆరోపించారు. మృతుల కుటుంబాలకు రూ.5 లక్షల సాయం చేయాలని డిమాండు చేశారు. ఆయన వెంట పార్టీ జిల్లా కార్యదర్శి డీవీ కృష్ణ తదితరులు ఉన్నారు.