అప్పుల బాధతో యువరైతు ఆత్మహత్య

ఉరవకొండ, విడపనకల్లు, న్యూస్‌టుడే: పంటలు పండక.. అప్పులు మిగిలి.. వాటిని తీర్చేమార్గం లేక యువరైతు బలవన్మరణానికి పాల్పడిన విషాద ఘటన విడపనకల్లు మండలంలో చోటుచేసుకుంది. కుటుంబీకులు, గ్రామస్థుల వివరాల మేరకు.. పొలికి గ్రామానికి చెందిన సుమన్‌(35)కి 2.45 ఎకరాల పొలం ఉంది. మరో 6 ఎకరాలు కౌలుకుని తీసుకుని కొన్నేళ్లుగా మిరప సాగు చేశారు. రెండేళ్లుగా పెట్టిన పెట్టుబడి కూడా దక్కలేదు. రూ.15 లక్షల వరకు అప్పులయ్యాయి. వాటిని తీర్చాలని హైదరాబాద్‌ వలస వెళ్లి కొన్నాళ్లుగా అక్కడే పనులు చేసుకుంటున్నారు. పిల్లలను బడిలో చేర్పించేందుకు రెండురోజుల కిందట గ్రామానికి వచ్చారు. అప్పులు ఇచ్చినవారి నుంచి ఒత్తిడి అధికమవడంతో భరించలేక సోమవారం రాత్రి ఇంట్లో పురుగుమందు తాగారు. గమనించిన కుటుంబసభ్యులు గుంతకల్లుకు తరలించారు. అక్కడి నుంచి అనంతపురం తీసుకెళుతుండగా మంగళవారం మృతి చెందారు. భర్త లేడన్న విషయాన్ని జీర్ణించుకోలేని భార్య సునీత స్పృహ కోల్పోయింది. ముగ్గురు కొడుకులు కన్నీరుమున్నీరుగా విలపించారు. విడపనకల్లు పోలీసులు కేసు నమోదు చేశారు.