తాళం వేసి ఉన్న ఇంట్లో చోరీ

రూ.7.8 లక్షల నగదు, బంగారం అపహరణ

రామచంద్రపురం, న్యూస్‌టుడే: రామచంద్రపురం ఒకటో వార్డు కొత్తూరులో తాళం వేసి ఉన్న ఇంట్లో మేడిశెట్టి దుర్గా ప్రసాద్‌ అనే వ్యక్తి ఇంట్లోకి దొంగలు చొరబడి రూ.6.80 లక్షల నగదు, సుమారు రూ.లక్ష విలువ చేసే 6.5 కాసుల బంగారం అపహరించారు. పోలీసుల కథనం ప్రకారం దుర్గా ప్రసాద్‌ రామచంద్రపురంలో దుర్గా కన్సల్టెన్సీ పేరుతో పాత వాహనాల కొనుగోలు, అమ్మకం వ్యాపారం చేస్తారు. సంక్రాంతి సందర్భంగా కుటుంబ సమేతంగా ఈ నెల 16న కుతుకులూరులోని అత్తారింటికి వెళ్లాడు. బుధవారం సాయంత్రం ఇంటికి వచ్చి చూసే సరికి వంట గదిపై పెంకులు తొలగించి ఉన్నాయి. బీరువా తెరచి ఉంది. అందులో దాచిన నగదు, బంగారం కనిపించలేదు. దీంతో పోలీసులకు సమాచారం అందించారు. డీఎస్పీ బాలచంద్రారెడ్డి, సీఐ శ్రీనివాస్‌, ఎస్‌.ఐ ఎన్‌.వి.సత్యనారాయణలు సంఘటనా స్థలానికి వెళ్లి పరిశీలించారు. సీఐ శ్రీనివాస్‌ పర్యవేక్షణలో కేసు నమోదు చేసి దర్యాప్తు చేస్తున్నట్లు ఎస్‌.ఐ సత్యనారాయణ తెలిపారు. సంఘటనా స్థలాన్ని క్లూస్‌ టీమ్‌ పరిశీలించింది.