కొబ్బరి రైతు ధరహాసం

కొబ్బరికాయలను ఎగుమతులకు సిద్ధం చేస్తున్న కార్మికులు
న్యూస్‌టుడే, అంబాజీపేట

కోనసీమ కొబ్బరిమార్కెట్‌ దసరా శోభ సంతరించుకుంది. దేవీశరన్నవరాత్రులను పురస్కరించుకుని ఇక్కడి కొబ్బరిమార్కెట్‌లో ధరలు పెరిగాయి. గత ఎనిమిది నెలలుగా ధరలు బాగా క్షీణించాయి. పైపెచ్చు ఆ ధరలు నిలకడగా ఉన్నాయి. దీంతో కొబ్బరిరైతులు నిరుత్సాహపడ్డారు. ఇప్పుడు దసరా మహోత్సవాలతో పాటు రానున్న దీపావళి, ఇతర రాష్ట్రాల్లో పండుగల నేపథ్యంలో కొబ్బరి ధరలు కొంచెం సంతృప్తికరంగా ఉన్నాయని అటు రైతులు... ఇటు వ్యాపారులు చెబుతున్నారు. దసరాకు ముందు కొబ్బరికాయలకు పెద్దగా ధర పలకలేదు.అప్పుడు వెయ్యికొబ్బరికాయలు రూ.8,000 ధర ఉంది. ఇప్పుడు ఆ ధర రూ.1,500లకు పెరిగి రూ.9,500 వద్ద నిలకడగా ఉంది. బిహార్‌, ఝార్ఖండ్‌ రాష్ట్రాల్లో ఛాట్‌పూజకు కొబ్బరి ధర పెరిగింది. ఆయా రాష్ట్రాల కొబ్బరికాయలకు డిమాండ్‌ వచ్చింది. ప్రస్తుతం బిహార్‌, ఝార్ఖండ్‌లతో పాటు గుజరాత్‌, మహారాష్ట్రలకు ఎగుమతులు జరుగుతున్నాయి.ఎనిమిది నెలల క్రితం 40 నుంచి 50 లారీల ఎగుమతులు జరిగేవి.ధర కొంచెం బాగుండటంతో ఇప్పుడు 100 నుంచి 120 లారీల కొబ్బరికాయలు ఆయా రాష్ట్రాలకు ఎగుమతి అవుతున్నాయి. వెయ్యి కొబ్బరికాయల ధర రూ.9,500 నుంచి ఇంకా ధర పెరిగితే కోనసీమ కొబ్బరిమార్కెట్‌ మరింత ఆశాజనకంగా ఉంటుందని కర్షకులు భావిస్తున్నారు.