పోస్ట్‌ పేమెంట్‌ బ్యాంకు నిధుల గోల్‌మాల్‌పై విచారణ

ఉద్యోగులు నిలదీస్తుండగా తలదించుకున్న వెంకటసతీష్‌

అమలాపురం పట్టణం: పోస్ట్‌ పేమెంట్‌ బ్యాంకు నిధుల గోల్‌మాల్‌లో ఆరోపణలు ఎదుర్కొంటున్న సీహెచ్‌ వెంకటసతీష్‌ను సస్పెండైన తపాలా ఉద్యోగినులు నిలదీయడంతో పట్టణంలో ఉద్రిక్త పరిస్థితి నెలకొంది. గతేడాది మే నెలలో అమలాపురం డివిజన్‌ తపాలాశాఖకు అనుసంధానంగా నడిచే ఇండియన్‌ పోస్ట్‌ పేమెంట్‌ బ్యాంకు నిధులు రూ.1.21 కోట్ల గోల్‌మాల్‌ జరిగింది. సీబీఐ విచారణలో భాగంగా వెంకటసతీష్‌ను అమలాపురం ప్రధాన తపాలా కార్యాలయంలో శుక్రవారం కార్యాలయ ఏఎస్పీ విశ్వేశ్వరరావు విచారించారు. అక్కడికి వచ్చిన సతీష్‌పై సస్పెండైన తపాలా ఉద్యోగినులు, సిబ్బంది ఆగ్రహం వ్యక్తం చేశారు. తమను నిలువునా మోసం చేశావంటూ విలపించారు. నిధులు డిపాజిట్‌ చేయడం, పోస్టల్‌ జీవిత బీమా పాలసీల సొమ్ము విత్‌డ్రా చేయడం వంటి నకిలీ లావాదేవీలు ఎందుకు చేశావని ఆవేదన వ్యక్తం చేశారు. అతను సమాధానం చెప్పకుండా మేడపైకి వెళ్లడంతో ఉద్యోగినులు పోలీసులను ఆశ్రయించారు. వారు అక్కడికి వచ్చి వెంకటసతీష్‌ను అదుపులోకి తీసుకుని స్టేషన్‌కు తరలించారు.