మత్తు, మాదకద్రవ్యాల విక్రేతలపై పీడీ చట్టం నమోదు

గుంటూరు రేంజ్‌ ఐజీ డాక్టర్‌ త్రివిక్రమవర్మ

గుంటూరు నేరవార్తలు, న్యూస్‌టుడే : మత్తు, మాదక ద్రవ్యాల కేసుల్లో నిందితులపై పీడీ చట్టం నమోదుకు ప్రతిపాదనలు సిద్ధం చేయాలని గుంటూరు రేంజ్‌ ఐజీ డాక్టర్‌ త్రివిక్రమ వర్మ అధికారులను ఆదేశించారు. బుధవారం ఐజీ గుంటూరులోని తన కార్యాలయం నుంచి గుంటూరు, పల్నాడు, బాపట్ల జిల్లాల ఎస్పీలు, డీఎస్పీలతో వీడియో కాన్ఫరెన్స్‌ నిర్వహించారు. ఐజీ మాట్లాడుతూ గంజాయి, మత్తు, మాదకద్రవ్యాల అక్రమ రవాణా, విక్రయాలు చేస్తున్న వారిని గుర్తించి పీడీ చట్టం నమోదుకు ప్రతిపాదనలు పెట్టాలన్నారు. నాటుసారా తయారు చేస్తున్న కేసుల్లో నేరాలకు పాల్పడుతున్నవారిపైనా పీడీ చట్టం నమోదుకు చర్యలు తీసుకోవాలన్నారు. సమావేశంలో గుంటూరు జిల్లా ఎస్పీ ఆరిఫ్‌ హఫీజ్‌, బాపట్ల ఎస్పీ వకుల్‌జిందాల్‌, ప్రకాశం ఎస్పీ మల్లికగార్గు, మూడు జిల్లాల డీఎస్పీలు పాల్గొన్నారు.