పార్టీ మారేది లేదు: సుమలత

మండ్య, న్యూస్‌టుడే : పార్టీ మారే విషయమై ఎలాంటి ఆలోచన చేయలేదని మండ్య లోక్‌సభ సభ్యురాలు సుమలత (స్వతంత్ర) స్పష్టం చేశారు. ఆమె మంగళవారం ఇక్కడ ఏర్పాటైన కేంద్ర పథకాల అమలుపై ప్రగతి పరిశీలనా సమావేశంలో పాల్గొన్నారు. ఇటీవల తాను భాజపాలో చేరనున్నట్లు వార్తలు వచ్చాయన్నారు. నిజానికి ఇంకా ఎలాంటి నిర్ణయం తీసుకోలేదని అన్నారు. తాను పార్టీ మారడంతో పాటు బెంగళూరు ఉత్తర నియోజకవర్గం నుంచి పోటీ చేసేందుకు ఆ పార్టీ టిక్కెట్‌ను కోరినట్లు కూడా వార్తలొచ్చాయన్నారు. తన తనయుడు అభిషేక్‌ రాజకీయాల్లోకి ప్రవేశించాలనే ఆలోచన లేదని ఒక ప్రశ్నకు సమాధానంగా చెప్పారు. సమావేశంలో జిల్లా పాలనాధికారి ఎన్‌.అశ్వతి, కార్యనిర్వహణాధికారి దివ్య ప్రభు, ఎస్పీ వేణుగోపాల్‌ తదితరులు పాల్గొన్నారు.