ఓటమిని సవాలుగా స్వీకరిద్దాం

కంట తడిపెట్టిన దడేసుగూరు బసవరాజ్‌

కారటగి, న్యూస్‌టుడే : ఎన్నికల్లో గెలుపు, ఓటములు సహజం. ఓటమిని సవాలుగా తీసుకుని మళ్లీ అధికారంలోకి వచ్చేందుకు ఆత్మ విశ్వాసంతో ముందుకు సాగుదామని కనకగిరి మాజీ శాసనసభ్యుడు దడేసుగూరు బసవరాజ్‌ పార్టీ శ్రేణలకు సూచించారు. కారటగిలో మంగళవారం జరిగిన ఆత్మావలోకన సమావేశంలో ఆయన మాట్లాడారు. యడియూరప్పను ముఖ్యమంత్రి స్థానం నుంచి తొలగించడం, పార్టీ ఎన్నికల ప్రణాళిక ఆలస్యంగా విడుదల చేయడం, ప్రణాళిక ప్రజలను ఆకర్షించకపోవడం పార్టీ ఓటమికి కారణాలన్నారు. మరోవైపు నాపై లేని పోని ఆరోపణలు, అసత్య ప్రచారాలు నా ఓటమికి కారణమైందని కంట తడి పెట్టారు. 2009 నుంచి తనకు అండగా ఉంటున్న కార్యకర్తలకు, ప్రజలకు కృతజ్ఞతలు తెలిపారు. మూడు తాలూకాల్లో 60 వేలకు పైగా ఓటర్లు తనపై విశ్వాసం ఉంచారు. వారికి రుణపడి ఉంటాను. కార్యకర్తలకు జిల్లా, తాలూకా పంచాయతీ ఎన్నికల్లో అండగా ఉండి వారి విజయానికి కృషి చేస్తానని తెలిపారు. నాయకులు నాగరాజ బిల్గార్‌, వీరేశ్‌ సాలోణి మాట్లాడారు. పార్టీ మండల అధ్యక్షుడు చంద్రశేఖర ముసాలి, వివిధ విభాగాల పార్టీ నాయకులు, కార్యకర్తలు పాల్గొన్నారు.