వలపుల వలలో చిక్కి ఓ నిర్మాత విలవిల.. దర్శకుడి అరెస్టు

బెంగళూరు (యశ్వంతపుర), న్యూస్‌టుడే : ఓ యువతి పన్నిన వలపుల వలలో చిక్కి ఓ నిర్మాత విలవిలలాడిన ఘటన బెంగళూరు పోలీసులను విస్తుపోయేలా చేసింది. అలా వలపన్ని.. డబ్బు గుంజేందుకు ప్రయత్నించిన సినీరంగానికే చెందిన వ్యక్తి, దర్శకుడు రవీంద్రను నగర పడమటి విభాగం పోలీసులు గురువారం అరెస్టు చేశారు. యువతుల సాయంతో లైంగిక బెదిరింపులకు పాల్పడి, నిర్మాతల నుంచి డబ్బు గుంజేందుకు ప్రయత్నించే పథకాన్ని వమ్ము చేసినట్లు అధికారులు వివరించారు. నిర్మాత మహదేవ్‌ వద్దకు యువతులను పంపించి డబ్బు కోసం బెదిరించారనే ఆరోపణలను పరిగణలోనికి తీసుకుని రవీంద్ర ఆటకట్టించారు. తనకు ఎదురైన ఇబ్బందిని బాధిత నిర్మాత అన్నపూర్ణేశ్వరి నగర పోలీసులకు ఫిర్యాదు చేశారు. దర్యాప్తు చేసిన పోలీసులు నిందితుడిని అరెస్టు చేశారు. చింగారి, శ్రీకంఠ, శిశిర తదితర సినిమాలకు మహదేవ్‌ నిర్మాతగా వ్యవహరించారు. నిందితుడు రవీంద్ర ‘బారబాత్‌’ అనే సినిమాకు దర్శకత్వం వహించారు. కేసు దర్యాప్తులో ఉంది.