కాటసాని ఆస్తులు రూ.75.19 కోట్లు

ఆయన భార్య పేరుతో 164.33 ఎకరాలు

ఈనాడు, కర్నూలు : పాణ్యం ఎమ్మెల్యే కాటసాని రాంభూపాల్‌రెడ్డి స్థిర, చరాస్తుల మొత్తం విలువ రూ.75.19 కోట్లుగా చూపారు. సోమవారం నామినేషన్‌తోపాటు ఇచ్చిన అఫిడవిట్‌లో కొన్ని లోపాలు ఉన్నట్లు గుర్తించిన రిటర్నింగ్‌ అధికారి నారపురెడ్డి మౌర్య వాటిని సవరించాలని సూచించారు. ఈ నేపథ్యంలో సవరించిన అంశాలతో కూడిన అఫిడవిట్‌ను ఆయన మంగళవారం అధికారులకు సమర్పించారు. కాటసాని, ఆయన సతీమణి, ఇద్దరు కుమార్తెలు, కుమారుడిపై ఉన్న చరాస్తుల విలువ రూ.26.95 కోట్లు కాగా స్థిరాస్తుల విలువ రూ.48.24 కోట్లుగా ఉంది. మొత్తం ఆస్తుల విలువ రూ.75.19 కోట్లు.. అప్పులు రూ.3.01 కోట్లుగా చూపారు. కాటసాని పేరుతో 10.87 ఎకరాల భూమి, ఆయన సతీమణికి 164.33 ఎకరాలు, కుమారుడికి 64.56 ఎకరాలు, ఒక కుమార్తెకు 2.93 ఎకరాలు, మరో కుమార్తెకు 2.91 ఎకరాలు ఉన్నట్లు చూపారు. ఆయన సతీమణికి మొత్తం 34 చోట్ల, కుమారుడికి 20 చోట్ల ఆయా భూములున్నాయి.

ఒకే ఒక్క కేసు..: కాటసాని రాంభూపాల్‌రెడ్డిపై కర్నూలు మూడో పట్టణ పోలీసుస్టేషన్‌ పరిధిలో ఒకే ఒక్క కేసు ఉండడం గమనార్హం. అదికూడా సర్వజన ఆసుపత్రిలో చికిత్స పొందుతున్న వారికి డబ్బులు పంపిణీ చేశారన్నది ఆరోపణ. సెక్షన్‌ 171(ఇ) కింద ఆ కేసు నమోదు చేశారు.