యాదాద్రిలో భక్తజన సందడి

యాదాద్రీశుడి సన్నిధిలో భక్తుల కోలాహలం

యాదగిరిగుట్ట, న్యూస్‌టుడే: యాదాద్రి పుణ్యక్షేత్రానికి ఆదివారం భక్తులు పోటెత్తారు. జంట నగరాల నుంచి కాకుండా ఇతర ప్రాంతాలకు చెందిన యాత్రికుల రాకతో క్షేత్ర పరిసరాలు కోలాహలంగా మారాయి. వేకువ జాము నుంచే కొండపై ఆలయ ప్రాంగణాలు భక్తుల జయజయధ్వానాలతో ఆధ్యాత్మికత అలముకున్నాయి. దైవదర్శనం, ప్రసాదాల కొనుగోలుకు భక్తులు బారులు తీరి కనిపించారు. ఆలయ ద్వారాలు తెరిచి, సుప్రభాతం నిర్వహించారు. మూలవరులకు నిజాభిషేకం, అర్చనలు జరిపారు. అభయమిస్తూ, ఆశీర్వదించే కవచమూర్తులకు స్వర్ణ పుష్పార్చన నిర్వహించారు. అష్టోత్తర పర్వాన్ని కొనసాగించారు. శ్రీ సుదర్శన హోమం, నిత్యకల్యాణం చేపట్టిన భక్తులకు ప్రసాదాలతో సహ ఆశీస్సులు అందజేశారు. సాయంత్రం అలంకార సేవోత్సవం  నిర్వహించి మాడవీధుల్లో భక్తుల సందర్శనార్థం ఊరేగించారు. రాత్రివేళ స్వయంభువులకు ఆరాధన, సహస్రనామార్చన జరిపారు. వివిధ ప్రాంతాలకు చెందిన భక్తులు హరి, హర ఆలయాలను సందర్శించి పూజలు నిర్వహించారు. శివాలయాన్ని సందర్శించిన భక్తులు శ్రీరామనవమి వేడుకలను తిలకించారు.

రాష్ట్ర హైకోర్టు జడ్జి జస్టిస్‌ అభిషేక్‌రెడ్డి, కుటుంబీకులను ఆశీర్వదిస్తున్న పూజారి

యాదాద్రీశుడి సేవలో హైకోర్టు న్యాయమూర్తి

యాదాద్రి పుణ్యక్షేత్రాన్ని రాష్ట్ర హైకోర్టు న్యాయమూర్తి జస్టిస్‌ ఎ.అభిషేక్‌రెడ్డి కుటుంబ సభ్యులతో కలిసి ఆదివారం సందర్శించారు. ప్రధానాలయంలో స్వయంభువులను దర్శించుకున్నారు. ఆలయ మర్యాదలతో అధికారులు, పూజారులు స్వాగతం పలికారు. దైవారాధనల్లో పాల్గొన్న న్యాయమూర్తితో పాటు ఆయన కుటుంబీకులకు శ్రీ లక్ష్మీనరసింహస్వామి వారి ఆశీస్సులను పండితులు, దేవుడి ప్రసాదాన్ని ప్రొటోకాల్‌ ఏఈవో రామ్మోహన్‌రావు అందజేశారు.