అప్పుల బాధతో అన్నదాత ఆత్మహత్య

దర్శి, న్యూస్‌టుడే: సేద్యం కలిసి రాక... అప్పులు తీరే మార్గం కానరాక... ఓ రైతు బలవన్మరణం చెందారు. దర్శి మండలం కొత్తపల్లిలో సోమవారం ఉదయం ఈ సంఘటన చోటుచేసుకుంది. ఏఎస్‌ఐ రాంబాబు తెలిపిన వివరాల ప్రకారం.. గ్రామానికి చెందిన కుందురు పెద వెంకటేశ్వర్లు (71)... తమకున్న అయిదెకరాలకు తోడు, మరో పదిహేను ఎకరాలు కౌలుకు తీసుకుని కంది, వరి సాగు చేస్తున్నారు. గత మూడేళ్లుగా వాతావరణం అనుకూలించక.. వచ్చిన కాస్త పంటకు తగిన ధర లభించక నష్టపోయారు. మరోవైపు చేపల చెరువులోనూ భాగస్వామిగా ఉండి పెట్టుబడి పెట్టారు. అదీ కలిసి రాలేదు. రూ.15 లక్షల మేర అప్పులు మిగిలాయి. రుణం తీర్చే దారి లేక గత కొన్నాళ్లుగా ఆవేదన చెందుతున్నారు. ఈ క్రమంలోనే సోమవారం ఉదయం పొలానికి వెళ్లి పురుగుల మందు తాగారు. తరువాత... కుటుంబసభ్యులు విషయం గుర్తించి వైద్యశాలకు తరలించారు. అప్పటికే మృతి చెందినట్లు వైద్యులు తెలిపారు. మృతదేహాన్ని దర్శి ప్రభుత్వ వైద్యశాలకు తరలించారు.