పెరిగిన నీటిమట్టం.. పంటకు నష్టం

నారాయణపురం ఆనకట్ట వద్ద నాగావళిలో వరదనీరు

బూర్జ, న్యూస్‌టుడే: నాగావళిలో నీటిమట్టం శనివారం ఆకస్మికంగా పెరిగింది. దీంతో ఒక్కసారిగా బూర్జ మండలం పరిధిలో ఉన్న ఆరు ఓపెన్‌ హెడ్‌ కాలువల నుంచి పంట పొలాల్లోకి నీరు చేరింది. పువ్వు, కాయతో ఉన్న అపరాల పంటకు ఇది నష్టం కలిగించేదే. వరికుప్పలు అడుగుభాగంలో నీరు చేరింది. కుప్పలు కూడా పాడవుతాయని రైతులు ఆవేదన వ్యక్తం చేస్తున్నారు. షట్టర్లు తుప్పుపట్టి దెబ్బతినడంతోనే కాలువల్లోకి వరదనీరు వచ్చేస్తోందని వారు ఆరోపిస్తున్నారు. దీనిపై జలనవరుల శాఖ ఎస్‌ఈ పొన్నాడ సుధాకర్‌ మాట్లాడుతూ ఒడిశాలో కురిసిన వర్షాల కారణంగా తోటపల్లి, మడ్డువలస జలాశయాల నుంచి 16 వేల క్యూసెక్కుల నీటిని నాగావళిలోకి విడుదల చేశారన్నారు. దీంతో నీటిమట్టం పెరిగిందని, నష్టం లేకుండా జాగత్తలు తీసుకుంటామని వివరించారు.