Jayalalitha: జయలలితకు వారసులు ఉండుంటే బాగుండేది: జస్టిస్‌ ఆర్ముగస్వామి

స్నాతకోత్సవంలో పాల్గొన్న జస్టిస్‌ ఆర్ముగస్వామి తదితరులు

సైదాపేట, న్యూస్‌టుడే: జయలలితకు వారసులు ఉండుంటే ఆస్పత్రిలో సహాయంగా ఉండే వారని విశ్రాంత న్యాయమూర్తి జస్టిస్‌ ఆర్ముగస్వామి వ్యాఖ్యానించారు. తిరుప్పూరు జిల్లా తారాపురంలో జరిగిన కళాశాల స్నాతకోత్సవంలో ఆయన పాల్గొన్నారు. ఈ సందర్భంగా మాట్లాడుతూ... జయలలిత మృతి గురించి దిల్లీ ఎయిమ్స్‌ తన నివేదికలో ఎలాంటి అనుమానం లేదని తెలిపిందన్నారు. కానీ జయలలిత గుండె సమస్యే ముఖ్యమైనదని, అలాంటప్పుడు ఆంజియో చేసుండాలని, ఎందుకు చేయలేదన్నదే తన అనుమానమని పేర్కొన్నారు. జయలలిత గుండెలో వెజిటేషియన్‌ అనే కాల్షియం డిపాజిటర్‌, చిన్న ద్వారమూ ఉన్నట్లు తెలిసిందన్నారు. ఆమెకు శస్త్రచికిత్స చేయాల్సిందన్నదే అందరి అభిప్రాయమన్నారు. ముగ్గురు వైద్యులు జయలలితకు ఆంజియో అవసరం లేదని చెప్పినట్లు, ఒక డాక్టర్‌ శస్త్రచికిత్స అవరం లేదని చెప్పినట్లు ఎయిమ్స్‌ నివేదికలో ఉందన్నారు. అందులో డాక్టర్లు సెరియన్‌, గిరినాథ్‌లు జయలలితను చూసినట్లు ఆధారాలు లేవన్నారు. వైద్యుడు శ్రీధర్‌ తాను చెప్పలేదని సాక్ష్యం ఇచ్చారని అన్నారు. అలాగే వైద్యుడు శ్యామువేల్‌ శస్త్రచికిత్స అవసరం లేదని చెప్పలేదని వివరించారని తెలిపారు. ఆ ప్రకారం ఎయిమ్స్‌ నివేదికను నిరాకరించానని తెలిపారు. అందుకోసం ఎయిమ్స్‌ ఆస్పత్రిని తాను నిందించటం లేదన్నారు. జయలలితకు వారసులు ఉండుంటే ఆస్పత్రితో సహాయంగా ఉండేదని తెలిపారు.