దివ్యాంగులకు ఉపయోగపడేలా యాప్‌

ప్రభుత్వ పాఠశాల విద్యార్థుల ప్రతిభ

ఉపాధ్యాయురాలితో కిషోర్‌, శివమారిముత్తు

సైదాపేట, న్యూస్‌టుడే: పాఠశాలలోని కంప్యూటర్‌ ల్యాబ్‌లో పైథాన్‌ కోడ్‌ ద్వారా దివ్యాంగుల సులభంగా కళ్లతో కంప్యూటర్‌లోని ఫైళ్లు ఉపయోగించే విధంగా సొంతంగా యాప్‌ రూపొందించారు తంజావూరు విద్యార్థులు. పట్టుకోట్టై ప్రభుత్వ మహోన్నత పాఠశాల విద్యార్థులు కిషోర్‌, శివమారిముత్తు నెలపాటు శ్రమించి పైథాన్‌ కోడింగ్‌ నేర్చుకున్నారు. దివ్యాంగులు సులభంగా కళ్లతో కంప్యూటర్‌లోని ఫైళ్లను నిర్వహించేలా అప్లికేషన్‌ రూపొందించారు. వీరికి ఉపాధ్యాయురాలు సుమిత్ర నేతృత్వం వహించారు. వల్లం పెరియార్‌ మణిమయం సైన్సు, సాంకేతిక విశ్వవిద్యాలయం, పెరియారు శతాబ్ది పాలిటెక్నిక్‌ కళాశాల తరఫున గత నవంబర్‌ 9- 11వ తేదీ వరకు జరిగిన ఓపెన్‌ హౌస్‌ 2022 సైన్సు ప్రదర్శనలో ఉత్తమ ఆవిష్కరణ అవార్డు ఈ విద్యార్థుల యాప్‌నకు దక్కింది. దీంతో లండన్‌ బకింగ్‌హామ్‌ విశ్వవిద్యాలయంలో పని చేసే పట్టుకోట్టై ప్రభుత్వ మాదిరి పాఠశాల పూర్వ విద్యార్థి వీరికి అసైన్‌మెంట్‌ ఇస్తున్నారు. కిషోర్‌, శివమారిముత్తు మాట్లాడుతూ... తిరుక్కురల్‌ (సూక్తులు) ఆధారంగా కొత్త అభ్యసన పద్ధతి తయారు చేసేందుకు ప్రణాళిక రచించినట్లు తెలిపారు.