Dhanush - Aishwaryaa: నటుడు ధనుష్‌, ఐశ్వర్యలపై కేసు కొట్టివేత

ప్యారిస్‌, న్యూస్‌టుడే: నటుడు ధనుష్‌, ఐశ్వర్యలపై సైదాపేట కోర్టులో దాఖలైన కేసుని కొట్టివేస్తూ హైకోర్టు ఉత్తర్వులు ఇచ్చింది. ధనుష్‌ నటించిన ‘వేలైయిల్లా పట్టదారి’ సినిమాలో సిగరెట్‌, పొగాకు ఉత్పత్తుల ప్రకటనల నిషేధం, క్రమబద్ధీకరణ చట్ట నిబంధనలు ఉల్లంఘించిన దృశ్యాలు చోటు చేసుకున్నాయి. ఈ సినిమాలో నటుడు ధనుష్‌ సిగరెట్‌ తాగే దృశ్యాలు వచ్చే సమయంలో తెరపై  హెచ్చరిక వచనాలు సరిగ్గా కనిపించలేదు. కాబట్టి నిర్మాణ సంస్థ, ధనుష్‌పై చర్యలు చేపట్టాలని తమిళనాడు పొగాకు నియంత్రణ సంస్థ తరఫున ప్రభుత్వానికి ఫిర్యాదు అందింది. అనంతరం ఈ విషయమై విచారణ జరిపిన ఆరోగ్యశాఖ డిప్యూటీ డైరెక్టరు సైదాపేట కోర్టులో ఐశ్వర్య, ధనుష్‌లపై కేసు దాఖలు చేశారు. అనంతరం ఈ కేసు సైదాపేట కోర్టులో విచారణ జరుగుతోంది. ఈ నేపథ్యంలో కేసును రద్దు చేయాలని ధనుష్‌, ఐశ్వర్య తరఫున హైకోర్టులో పిటిషన్‌ దాఖలు అయింది. దీంతో కేసును కొట్టివేస్తూ జస్టిస్‌ ఆనంద వెంకటేశ్‌ సోమవారం తీర్పు ఇచ్చారు.