నిలిచిన రూ.15 వేల పెంపు ప్రతిపాదన

కార్పొరేషన్‌, న్యూస్‌టుడే: జీవీఎంసీ ఉద్యాన విభాగంలో పనిచేస్తున్న నలుగురు పొరుగు సేవల ఉద్యోగులకు ఒకేసారి రూ.15 వేల వేతనం పెంచే అంశాన్ని అజెండాలో ప్రతిపాదించడంపై కమిషనర్‌ రాజాబాబు ఆశ్చర్యం వ్యక్తం చేశారు. తక్షణమే ఆ ప్రతిపాదన పక్కన పెట్టాలని ఉద్యాన విభాగాధికారి దామోదరరావును ఆదేశించారు. ఈ నెల 27న ‘ఈనాడు’లో ‘ఒకేసారి 15వేలా’ శీర్షికతో ప్రచురితమైన కథనానికి ఆయన స్పందించారు. సోమవారం ఉద్యాన విభాగాధికారిని పిలిచి ఆరా తీశారు. తనకు తెలియకుండా ఈ అంశం ఎలా చేరిందని ప్రశ్నించారు. గత కమిషనర్‌ లక్ష్మీశ వేతనాల పెంపునకు ఆమోదించారని చెప్పగా, ఇన్నాళ్లు కౌన్సిల్‌ సమావేశంలో ఎందుకు పెట్టలేదని ప్రశ్నించారు. మేయరు, అధికార పార్టీ నాయకులు ఒప్పుకోలేదని ఆయన చెప్పడం గమనార్హం. మరి ఇప్పుడెలా అంగీకరించారని కమిషనర్‌ ప్రశ్నించగా అధికారి సమాధానం ఇవ్వలేదు. నలుగురు సిబ్బందికి ఒకేసారి రూ.15వేలు పెంచితే, మిగతావారు ఊరుకుంటారా అని కమిషనర్‌ ఆగ్రహం వ్యక్తం చేశారు. ఆ ప్రతిపాదన పక్కన పెట్టాలని ఆదేశించారు. బ్యాటరీ కారు కొనుగోలు చేయాలని అజెండాలో ప్రతిపాదించడంపైనా ఆశ్చర్యం వ్యక్తం చేశారు. తనకు తెలియకుండా నిర్ణయాలు చేస్తే కఠిన చర్యలు తప్పవని హెచ్చరించారు.