టమాటా పోయింది.. అరటికి ముప్పుంది!

తాళ్లచీడికాడ వద్ద అరటి తోటలో నిలిచిన వర్షపు నీరు

గొలుగొండ, న్యూస్‌టుడే: ఉపరితల ఆవర్తనం ప్రభావంతో శని, ఆదివారాల్లో కురిసిన భారీ వర్షాలకు గొలుగొండ మండలంలో సుమారు 300 ఎకరాల్లో టమాటా తోటలు దెబ్బతిన్నాయి. ఇవి తిరిగి కోలుకునే అవకాశం లేదని రైతులు చెబుతున్నారు. తాళ్లచీడికాడ, ఏటిగైరంపేట, లింగంపేట, పాకలపాడు, రావణాపల్లి, కొమిరి, ముంగర్లపాలెం తదితర ప్రాంతాల్లో వెయ్యి ఎకరాల్లో సాగవుతున్న అరటి తోటల్లో నీరు నిలిచిపోవడంతో రైతులు ఆందోళన చెందుతున్నారు. రెండు రోజుల్లో 89.4 మి.మీ. వర్షపాతం నమోదైంది. వాతావరణ శాఖ ప్రకటన ప్రకారం ఈ నెల 21 వరకు వర్షాలు పడితే ఇప్పటికే కోతకు సిద్ధంగా ఉన్న అరటి గెలలు నేలవాలుతాయేమోనని వాపోతున్నారు.