మంకీ ఫుడ్‌కోర్టులో అగ్ని ప్రమాదం

కాలిపోయిన మొక్కలను పరిశీలిస్తున్న డీపీవో వెంకయ్య

ములుగు, న్యూస్‌టుడే: ములుగు మండలం జాకారంలోని మంకీ ఫుడ్‌కోర్టులో ఆదివారంరాత్రి అగ్ని ప్రమాదం జరిగింది. గ్రామ పంచాయతీ ఆధ్వర్యంలో పెంచుతున్న పండ్ల మొక్కలు కాలిపోయాయి. ఫుడ్‌కోర్టు సమీపంలోని పంట పొలాలకు చెందిన గడ్డిని రైతులు తగులబెట్టడంతో మంటలు చెలరేగి మంకీ ఫుడ్‌కోర్టులోకి వ్యాపించాయి. దీంతో మొక్కలు కాలిపోయాయి.  ఇతర ప్రాంతం నుంచి అగ్నిమాపక వాహనం వచ్చేలోగా నష్టం జరిగిపోయింది. గ్రామ పంచాయతీకి చెందిన నీటి ట్యాంకుతో మంటలను ఆర్పేందుకు ప్రయత్నం చేసినప్పటికీ ఫలితం లేకపోయింది. సోమవారం జిల్లా పంచాయతీ అధికారి వెంకయ్య మంకీ ఫుడ్‌కోర్టు ప్రదేశాన్ని సందర్శించారు. ప్రమాదం జరిగిన తీరును పరిశీలించారు. ఈ వివరాలను జిల్లా అదనపు కలెక్టర్‌ ఇలా త్రిపాఠికి వివరించారు.