నేడు తాడేపల్లిగూడెంలో తెదేపా బహిరంగ సభ

తాడేపల్లిగూడెం టూటౌన్‌, న్యూస్‌టుడే: తాడేపల్లిగూడెంలో తెలుగుదేశం పార్టీ అధినేత చంద్రబాబునాయుడి బహిరంగ సభను 50 వేల మందితో నిర్వహించనున్నట్లు ఆ పార్టీ జిల్లా అధ్యక్షురాలు తోట సీతారామలక్ష్మి తెలిపారు. ఇదేం ఖర్మ.. మన రాష్ట్రానికి కార్యక్రమంలో భాగంగా శేషమహల్‌ కూడలిలో నిర్వహించనున్న బహిరంగ సభ ఏర్పాట్లను గురువారం ఆమె నియోజకవర్గ అధ్యక్షుడు వలవల బాబ్జీతో కలిసి పర్యవేక్షించారు. తాడేపల్లిగూడెం మండలం నందమూరు, ఆరుళ్ల, నవాబ్‌పాలెంలలో పర్యటించారు. శుక్రవారం సాయత్రం 4.30 గంటలకు తాడేపల్లిగూడెం మండలం నందమూరు అక్విడక్టు వద్ద చంద్రబాబునాయుడికి పశ్చిమగోదావరి జిల్లా నాయకులు, కార్యకర్తలు ఘన స్వాగతం పలుకుతారన్నారు. అక్కడి నుంచి 5 వేల వాహనాలతో ర్యాలీగా పర్యటన ప్రారంభమవుతుందన్నారు. నవాబ్‌పాలెంలోని ధాన్యం కొనుగోలు కేంద్రంలో రైతులు ఎదుర్కొంటున్న సమస్యలను చంద్రబాబునాయుడు స్వయంగా తెలుసుకుంటారన్నారు. ర్యాలీగా భీమవరం బైపాస్‌, గొర్రెల సూరన్న కాంప్లెక్సు, పోలీస్‌ ఐలాండ్‌, ఫ్లైఓవర్‌ మీదుగా ఎన్టీఆర్‌ చౌక్‌కు చేరుకొని బహిరంగ సభలో ప్రసంగిస్తారన్నారు. సభలో కార్యకర్తలు, ప్రజలకు ఎలాంటి ఇబ్బందులు కలగకుండా ఏర్పాట్లు చేశామన్నారు. శ్రీధర్‌, రవికుమార్‌, వెంకట్రావు, రాంప్రసాద్‌చౌదరి తదితరులు పాల్గొన్నారు.