స్వామి వైభవం.. ఆనంద పరవశం

గజ వాహనంపై స్వామివారి గ్రామోత్సవం

అంతర్వేది, మామిడికుదురు, న్యూస్‌టుడే: అంతర్వేది లక్ష్మీనృసింహస్వామి వారి దివ్య పరిణయోత్సవాల్లో భాగంగా ఆరో రోజు గురువారం వాహనోత్సవాలను భక్తులు ఆనంద పారవశ్యంతో వీక్షించారు. సాయంత్రం 4 గంటలకు దివ్య మంగళ ఉత్సవ మూర్తులను గజ వాహనంపై కొలువుదీర్చారు. అర్చకులు, వేద పండితుల మంత్రోచ్చారణలు, మంగళ వాయిద్యాల నడుమ అంతా జయధ్వానాలు చేస్తూ గ్రామోత్సవాన్ని నిర్వహించారు. రాత్రి 7 గంటలకు పొలమూరి సత్రం నిర్వాహకుల ఆధ్వర్యంలో అన్నాన్ని ఆలయ సన్నిధిలో కుంభం పోసి స్వామివారికి నివేదించారు. అనంతరం దానిని ప్రసాదంగా భక్తులకు వితరణ చేశారు.