ఆగని ఇసుక దందా

కరుగోరుమిల్లిలో ఇసుక తవ్వకాలకు పొక్లెయిన్ల వినియోగం
ఆచంట, న్యూస్‌టుడే: ఆచంట మండలం కరుగోరుమిల్లిలో సోమవారం కూడా ఇసుక తవ్వకాలు పెద్దఎత్తున జరిగాయి. ఆదివారం గ్రామస్థులు అడ్డుకోవడంతో తాత్కాలికంగా ఇసుక రవాణా నిలిచింది. తిరిగి సోమవారం ఉదయం నుంచి పెద్ద ఎత్తున యంత్రాలతో ఇసుక తవ్వకాలు సాగిస్తున్నారు. పొక్లెయిన్‌లతో నదీ గర్భంలో నీరు ఉన్న గోతుల ప్రాంతాల్లో సైతం ఇసుక తీసి గుట్టలు పెడుతున్నారు. నిమిషాల్లో లారీల్లో లోడు చేసి తరలిస్తున్నారు. నిబంధనలకు విరుద్ధంగా ఇంత పెద్దఎత్తున ఇసుక తవ్వకాలు, రవాణా జరుగుతున్నా పట్టించుకున్న నాథుడు లేరు. ఫిర్యాదు చేసినా స్పందించడం లేదని కరుగోలుమిల్లి గ్రామస్థులు, ప్రజా సంఘాల ప్రతినిధులు ఆందోళన వ్యక్తం చేస్తున్నారు. కలెక్టర్‌, మైన్స్‌ అధికారులు, పర్యావరణ అధికారులకు అనేక సార్లు ఫిర్యాదులు చేశామని తెలిపారు.