ఆకాశంలో తెల్లటి చుక్క..ఆరా తీస్తే బుడగ

జీలుగుమిల్లి, న్యూస్‌టుడే: ఆకాశంలో తెల్లటి చుక్క అందరినీ ఆశ్చర్యానికి గురిచేసిన సంఘటన ఆంధ్రా-తెలంగాణ సరిహద్దు ప్రాంతం జీలుగుమిల్లి మండలం తాటియాకులగూడెంలో చోటుచేసుకుంది. ఈ చుక్క గంటల తరబడి అక్కడే దర్శనమివ్వడంతో ప్రజల్లో ఆందోళన మొదలైంది. సామాజిక మాధ్యమాల్లోనూ హల్‌చల్‌ చేసింది. ఏదో గ్రహశకలం భూమికి అత్యంత దగ్గరగా వచ్చిందంటూ వదంతలు చక్కర్లు కొట్టాయి. ఆరా తీస్తే ..తాటియాకులగూడెంలో కొంతమంది యువకులు బుధవారం ఓ ఇంటి మేడపై పెద్ద బుడగ (ప్యారాచూట్‌ బెలూన్‌) కట్టేందుకు ప్రయత్నించారు. ఆ సమయంలో తాడు తెగడంతో ఆకాశంలోకి చాలా ఎత్తుకు వెళ్లిపోయింది. గురువారం ఉదయం కనిపించింది. సూర్య కిరణాలు బుడగపై పడగా తెల్లగా మెరుస్తూ అబ్బురపరిచింది. చివరికి విషయం తెలిశాక ఊపిరి పీల్చుకున్నారు.