Venkaiah Naidu: వాళ్లను మరవడం మానవ నైజం కాదు: వెంకయ్య నాయుడు

విశాఖపట్నం: బూతులు మాట్లాడే రాజకీయ నాయకులకు పోలింగ్‌ బూత్‌లో ఓటుతో సమాధానం చెప్పాలని మాజీ ఉపరాష్ట్రపతి వెంకయ్య నాయుడు అన్నారు. విశాఖపట్నంలోని సీతమ్మధారలో ఓ పాఠశాల గోల్డెన్‌ జూబ్లీ వేడుకల్లో ఆయన ముఖ్య అతిథిగా పాల్గొన్నారు. చదువు ఎంత ముఖ్యమో సంస్కారం అంతే ముఖ్యమని చెప్పారు. విద్యతోనే విలువలతో కూడిన పౌరులుగా తయారవుతారన్నారు. కన్నతల్లిని, మాతృభాషను, జన్మభూమిని, పాఠం చెప్పిన గురువును, చదువు నేర్చుకున్న విద్యాసంస్థను మర్చిపోవడం మానవ లక్షణం కాదని తెలిపారు. అమ్మ అనే మాట అంతరాళం నుంచి వస్తుందని, మమ్మీ అనే మాట పెదవుల నుంచి మాత్రమే వస్తుందన్నారు. మాతృభాష కళ్ల వంటిదని, పరాయి భాష కళ్లద్దాల వంటిదన్నారు. మాతృభాషను మరువొద్దని విద్యార్థులకు సూచించారు.