జనవరిలో చైనాకు నిపుణుల బృందం:  WHO

దిల్లీ: కొవిడ్‌-19 పుట్టుకపై విచారించేందుకు వచ్చే జనవరిలో అంతర్జాతీయ నిపుణుల బృందం చైనాను సందర్శించనుంది. ఈ మేరకు ప్రపంచ ఆరోగ్య సంస్థ(డబ్ల్యూహెచ్‌వో) బుధవారం అధికారికంగా వెల్లడించింది. డబ్ల్యూహెచ్‌వో ప్రతినిధి హెడిన్‌ హాల్‌డర్సన్‌ ఓ మీడియాతో మాట్లాడుతూ.. వచ్చే ఏడాది జనవరిలో అంతర్జాతీయ నిపుణుల బృందం చైనా పర్యటనకు వెళ్లనున్నట్లు చెప్పారు. వారు వైరస్‌ ఎక్కడ పుట్టిందనే విషయంపై విచారణ చేపట్టనున్నట్లు పేర్కొన్నారు. 

ప్రపంచవ్యాప్తంగా కరోనా వైరస్‌ వ్యాప్తి చెంది ఏడాది కాలం పూర్తైంది. ఇప్పటివరకూ ఆ మహమ్మారి ప్రపంచవ్యాప్తంగా 10లక్షలకు పైగా బాధితులను బలితీసుకుంది. అంతేకాకుండా ఏడు కోట్లకు పైగా జనం దాని బారిన పడ్డారు. అయితే ఈ వైరస్‌ ఎక్కడ పుట్టింది? అనే విషయం మాత్రం సర్వత్రా మిస్టరీగా ఉండిపోయింది. ఆ విషయాల్ని కనుగొనేందుకు చైనాకు అంతర్జాతీయ నిపుణుల బృందాన్ని పంపే విషయమై డబ్ల్యూహెచ్‌వో నెలల తరబడి పనిచేస్తోంది.  

కాగా ఐరాస ఆరోగ్య విభాగం వైరస్‌ పుట్టుకపై దర్యాప్తు చేపట్టేందుకు ఇప్పటికే జులైలో ఓ బృందాన్ని బీజింగ్‌కు పంపిన విషయం తెలిసిందే. మొదట పరిశోధకులు చైనాలోని వుహాన్‌లోని విదేశీ జంతు మాంస విక్రయ మార్కెట్లో.. వైరస్‌ జంతువుల నుంచి మనుషులకు సంక్రమించిందని అభిప్రాయపడ్డారు. కానీ ప్రస్తుతం వైరస్‌ వ్యాప్తికి ఆ మార్కెట్‌ కారణం కాకపోవచ్చు అని సందేహాలు వ్యక్తం చేస్తున్నారు. 

ఇదీ చదవండి

చుక్కలు కలిసిన ఆ రాత్రి!