నౌకలో మరో ఇద్దరు భారతీయులకు కొవిడ్‌

టోక్యో: జపాన్‌కు చెందిన ‘డైమండ్‌ ప్రిన్సెస్‌’ నౌకలో మరో ఇద్దరు భారతీయులకు కొవిడ్‌-19 సోకింది. ఈ మేరకు ఆదివారం జపాన్‌లోని భారత రాయబార కార్యాలయ అధికారులు వెల్లడించారు. గత రెండు రోజుల్లో ఈ నౌకలో కొత్తగా 137 మంది వైరస్‌ బారిన పడ్డారని తెలిపారు. నౌకలో తుది పరీక్షలు ఫిబ్రవరి 17 నుంచి మొదలవుతాయని చెప్పారు. వాటి అనంతరం భారతీయులను బయటికి తీసుకువచ్చేందుకు అన్ని రకాలుగా సహకారం అందించడానికి భారత రాయబార కార్యాలయం సిద్ధంగా ఉన్నట్లు వారు పేర్కొన్నారు. ప్రస్తుతం నౌకలో కొవిడ్‌ సోకిన వారి సంఖ్య మొత్తం 355కి చేరుకున్నట్లు జపాన్‌ అధికారులు వెల్లడించారు. 

జపాన్‌కు చెందిన డైమండ్‌ ప్రిన్సెన్‌ నౌక నుంచి హాంకాంగ్‌లో దిగిన వ్యక్తికి కొవిడ్‌ సోకినట్లు గుర్తించడంతో దాన్ని యొకొహామా పోర్టులో నిలిపివేశారు. ఇందులో 3700పైగా ప్రయాణికులు ఉన్నారు. కాగా ఇప్పటివరకు చైనాలో వైరస్‌ కారణంగా 1600 మందికి పైగా మృత్యువాత పడినట్లు అక్కడి అధికారులు వెల్లడించారు.

ఇదీ చదవండి..
ఆ 406 మందికి కొవిడ్ సోకలేదు