అదే సైనికులకు నిజమైన నివాళి: ఎస్‌జేఎం

దిల్లీ: ప్రభుత్వ టెండర్ల ప్రక్రియలో పాల్గొనకుండా చైనా సంస్థలను నిషేధించాలని ఆరెస్సెస్‌ అనుబంధ సంస్థ స్వదేశీ జాగరణ్‌ మంచ్‌(ఎస్‌జేఎం) కేంద్ర ప్రభుత్వాన్ని కోరింది. సరిహద్దులో చైనాతో ఘర్షణలో వీరమరణం పొందిన 20 మంది సైనికులకు అదే నిజమైన నివాళి అని వ్యాఖ్యానించింది. అలాగే ప్రజలు సైతం చైనా ఉత్పత్తుల్ని బహష్కరించడానికి ఇదే సరైన సమయమని ఎస్‌జేఎం కో-కన్వీనర్‌ అశ్వనీ మహాజన్‌ పిలుపునిచ్చారు. నటీనటులు, క్రికెటర్లు సహా ఇతర రంగాల్లోని ప్రముఖులు చైనా ఉత్పత్తుల్ని ప్రమోట్‌ చేయొద్దని కోరారు. 

సరిహద్దుల్లో భారత్‌-చైనా సైనికుల మధ్య జరిగిన ఘర్షణలో సోమవారం 20 మంది భారత సైనికులు వీరమరణం పొందిన విషయం తెలిసిందే. చైనా వైపూ 43 మంది మృతిచెందినట్లు సమాచారం. లద్దాఖ్‌లో గత ఆరు వారాలుగా ఇరు వర్గాల మధ్య వాస్తవాధీన రేఖ వెంట ఘర్షణలు చోటుచేసుకుంటున్న విషయం తెలిసిందే. ఇటీవల చర్చల అనంతరం బలగాల్ని ఉపసంహరించుకుంటున్న క్రమంలో ఇరు వర్గాల మధ్య తలెత్తిన ఘర్షణే తాజా ప్రాణనష్టానికి దారితీసింది.